وردەکاریی دەستگیرکردنی سێ پەرلەمانتار و پێنج پاسەوان و فەرمانبەری عێراق

رووداو دیجیتاڵ 

هێزە ئەمنییەکانی هەرێمی کوردستان، سێ پەرلەمانتار و پێنج پاسەوان و فەرمانبەری عیراقیان بە فەرمانی دادوەر دەستگیرکرد و دواتر لە بازگەی پردێ رادەستی هێزە عێراقییەکانیان کران.

سەرچاوەیەک لە دەستەی دەسپاکیی عێراق، رۆژی دووشەممە (29ی حوزەیرانی 2026) بە تۆڕی میدیایی رووداوی راگەیاند: "ئەمڕۆ دوو تیمی دەستەی دەسپاکیی عێراق لە پارێزگای هەولێر و تیمێکی دیکە لە پارێزگای کەرکووک بوون؛ دوای ئەوەی دوێنێ یەکشەممە دەستگیرکراوەکانیان لە بازگەی پردێ لەلایەن ئاسایش و دژە تیرۆری کوردستانەوە وەرگرتەوە، رادەستی هێزە ئەمنییەکانی عێراقیان کردن."

بەگوتەی سەرچاوەکەی دەسپاکیی عێراق، دەستگیرکراوەکان پێکهاتوون لە سێ پەرلەمانتار و پێنج پاسەوان و فەرمانبەر. لە کاتی دەستگیرکردنیاندا بڕی 10 ملیۆن دینار و 15 چەکی جۆری دەمانچە و ئێم فۆڕیان پێبووە.

ئەو سەرچاوەیە ئاماژەی بەوەش کرد، دەستگیرکردنی گەندەڵکاران بەردەوام دەبێت و بڕیارە لە پارێزگای کەرکووک ئەمڕۆ دووشەممە هەڵمەتێکی دیکە بکرێت.

دوێنێ یەکشەممە، هێزێکی بەرپەرچدانەوەی خێرا و دژە تیرۆری عێراق بە ئۆتۆمبێلی مۆدێل بەرزەوە چوونە کەرکووک و دواتر دەستگیرکراوەکانیان بە ئۆتۆمبێلی ئاسایی بەرەو بەغدا گواستەوە.

ناوی پەرلەمانتارە دەستگیرکراوەکان

زیاد تاریق جەنابی: پەرلەمانتاری هاوپەیمانیی سەروەری (بە سەرۆکایەتی سەرمەد خەمیس خەنجەر).
محەممەد جەمیل مەیاحی: پەرلەمانتار و سەرۆکی هاوپەیمانیی (واست ئەجمەل) و پارێزگاری پێشووی واست.
ئەشواق سالم حەسەن جبووری: پەرلەمانتاری فراکسیۆنی ئاوەدانکردنەوە و گەشەپێدان (بە سەرۆکایەتی سوودانی).