رووداو دیجیتاڵ
وەزارەتی دەرەوەی عێراق پێشوازی لە بڕیاری 11 وڵاتی جیهان دەکات بۆ سنووردارکردنی بازرگانیی کاڵا لەگەڵ ئیسرائیل و دەڵێ: "ئەمە هەنگاوێکی دروستە بۆ پشتگیریکردنی مافەکانی گەلی فەلەستین."
وەزارەتی دەرەوەی عێراق، رۆژی پێنجشەممە، 17-9-2026، لە راگەیێندراوێکدا رایگەیاند، پێشوازی لە بڕیاری وەزیرانی دەرەوەی هەریەکە لە وڵاتانی (کەنەدا، فینلاند، فەرەنسا، ئایسلاند، ئایرلاند، نەرویج، پۆڵاند، پۆرتوگال، ئیسپانیا، سوێد و بەریتانیا) دەکەن بۆ دانانی سنوور بۆ بازرگانیکردن لەگەڵ ئیسرائیل.
وەزارەتی دەرەوەی عێراق دەڵێت: "عێراق ئەم بڕیارە بە هەنگاوێکی دروست دەزانێت لە ئاراستەی پشتیوانیکردنی هەوڵە نێودەوڵەتییەکان بۆ رێگریکردن لە سیاسەتە نیشتەجێکارییەکانی ئیسرائیل، کە بە پێشێلکارییەکی روونی بڕیارە نێودەوڵەتییەکان و دەستدرێژی بۆ سەر مافەکانی گەلی فەلەستین دادەنرێت."
وەزارەتی دەرەوەی عێراق دەشڵێت:" هەڵوێستی ئەو وڵاتانە پەرەسەندنێکی ئەرێنییە لە چوارچێوەی بەهێزکردنی رێزگرتن لە یاسا نێودەوڵەتییەکان".
عێراق هیوای خواستووە وڵاتانی دیکەی جیهانیش هەنگاوی هاوشێوە بنێن بۆ ئەوەی رێگری لە چالاکییە نیشتەجێکارییەکان بکرێت و مافە رەواکانی گەلی فەلەستین مسۆگەر بکرێن.
عێراق بە فەرمی پەیوەندیی سیاسی و بازرگانی لەگەڵ ئیسرائیل نییە و بەپێی یاسای (قەدەخەکردنی ئاساییکردنەوە) کە لە پەرلەمانی عێراق پەسندکراوە، هەر جۆرە پەیوەندییەک لەگەڵ ئیسرائیل بە تاوان دادەنرێت.
