رووداو - تەندروستی
تەنیا زیادکردنی چەند خولەکێکی کەم بۆ چالاکیی رۆژانەت دەتوانێت مەترسیی مردنی پێشوەختە بە رێژەیەکی بەرچاو کەم بکاتەوە.
زۆرینەی کاتەکان وا بیر دەکەینەوە بۆ پاراستنی تەندروستی گۆڕانکاریی گەورە و قورسی دەوێت لە شێوازی ژیاندا بەڵام توێژینەوەیەکی زانستیی لەسوێد پێچەوانەکەی سەلماندووە و دەریدەخات، بچووکترین چالاکیی رۆژانە کاریگەرییەکی گەورەی لەسەر درێژبوونەوەی تەمەن و تەندروستیی گشتی دەبێت.
پڕۆفیسۆر د. ماریا هاگسترۆمەر، توێژەری سەرەکی لە بەشی دەمارناسی و زانستە تەندروستییەکان لە زانکۆی کارۆلینسکا دەریخستووە، تەنیا چەند خولەکێکی کەم پیاسەی خێرا لە رۆژدا دەکرێت ئەگەری مردنی پێشوەختە کەم بکاتەوە.
توێژەران شیکارییان بۆ زیاتر لە 135 هەزار کەس لە وڵاتانی سوێد، نەرویج، بەریتانیا و ئەمریکا کردووە. لەرێگەی بەکارهێنانی ئامێری پێشکەوتووی پێوانەکردنی جووڵە، چاودێریی وردی چالاکییەکان و کاتی دانیشتنی ئەو کەسانە کراوە. گرنگترین ئەنجامەکانی توێژینەوەکە بەم شێوەیە بووە؛
- پێنج خولەک جووڵە؛ زیادکردنی تەنیا پێنج خولەک چالاکی بە رێژەی مامناوەند وەک (پیاسەی خێرا، باخەوانی یان بەکارهێنانی قادرمە) لە رۆژێکدا، مەترسیی مردنی پێشوەختە بە رێژەی نزیکەی 6٪ بۆ 10٪ کەم دەکاتەوە.
- کەمکردنەوەی دانیشتن: یارمەتیدەرە بۆ دابەزاندنی مەترسییە تەندروستییەکان بە رێژەی 3٪ بۆ 7٪.
بەپێی توێژینەوەکە چەند رێنوێنییەک بۆ ئەوکەسانەی لەنێو ئۆفیس کار دەکەن
- لەکاتی کارکردندا لە ئۆفیس، هەر نیو کاتژێر جارێک هەستە سەر پێ و بۆ ماوەیەک پیاسەیەکی کورت بکە.
- لە شوێنی بەکارهێنانی بەرزکەرەوە، قادرمە بەکار بهێنە.
- کاتێک دەچیتە دەرەوە، ئەگەر شوێنەکە نزیک بوو، بەپێ بڕۆ و پشت بە ئۆتۆمبیل مەبەستە.
