رووداو - تەندروستی
نوێترین بەرنامەی دکتۆر ئاراس لەبارەی دۆخی کەسایەتییەکی نێو سۆشیاڵ میدیا بوو کە لە دۆخی تەندروستی کۆڵدرایەوە و کۆمەڵێک پشکنین و رێنوێنیی پێدرا. ئەو کەسەش ئەدهەم ئەحمەدە کە بەوە ناسراوە ''خۆشخۆرە و بە چێژەوە خۆراک دەخوات''.
لەنێو بەرنامەکە سێ پسپۆڕ باسیان لە پشکنین و دۆخی تەندروستیی ئەدهەم کرد، یەکێک لەوانە د. کارزان عەبدوڵڵا، پسپۆڕی نەخۆشییەکانی دڵ و هەناو بوو کە گوتی: مێشک داوای هۆڕمۆنەکانی دڵخۆشی دەکات، کە کۆنتڕۆڵی گەدە دەکەن و برسی دەکات، لەبەر ئەوەی هەندێکجار بۆ رەواندنەوەی دڵتووندی و خەمباری، پەنا دەبرێتە بەر خواردن و بەتایبەتیش خواردنی شیرینی.
د. مازیار جەبار، پسپۆڕی نەخۆشییەکانی شەکرە و هەناو دەڵێت: ئەوانەی زۆر دەخۆن و قەڵەویشن، ئەو هۆڕمۆنەیان لە جەستەدا کەم دەبێتەوە کە هەستی تێربوونیان لەکاتی خواردندا پێدەدات، ئەمەش وا لە کەسەکە دەکات، ئەوەی دەیخوات، هێشتا هەر کەم بێت و حەزی زۆر زیاتر بێت.
ئەوین هیوا، خۆراکناس رایدەگەیێنێت، بۆ ئەوەی ئەدهەم لاواز ببێتەوە، پێویستە سەرەکیترین رێگە گۆڕانکاری بێت لە خۆراکەکانی، بەتایبەت کەمکردنەوەیان و گۆڕینیان بۆ سەوزە، میوە و خۆراکە پڕ پڕۆتین و ریشاڵییەکان.
ئەنجامی پشکنینەکانی ئەدهەم ئەوە دەردەخەن، ئەو بەهۆی قەڵەوییەکەیەوە دڵی لاواز بووە و تەمەنی دڵ و لوولەکانی خوێنی پیرترە لەو تەمەنی ئێستا هەیەتی، بەجۆرێک 16 ساڵ پیرترە و هی دڵی کەسێکی 65 ساڵە. د. کارزان ئەوەش ئاشکرا دەکات کە ئەدهەم 110 کیلۆگرام لە کێشی ئاسایی زیاترە (ئەمەش ئەگەری مردنی لەناکاو، جەڵتە و گیرانی لوولەکانی خوێن)ـی زیاد دەکات.