د. ترەیدەر: بەهای دینار بەرامبەر دۆلار زیاتر دادەبەزێت

رووداو دیجیتاڵ

نرخی هەر 100 دۆلارێک لە هەرێمی کوردستان بە زیاتر لە 152 هەزار دینار مامەڵەی پێوە دەکرێت.

26ـی تەمموزی 2026، بەهای دینار گەیشتە بەرزترین ئاستی لەم ساڵدا و 100 دۆلار بە 149 هەزار و 750 دینار فرۆشرا.

نرخی دینار بەرامبەر بە دۆلار تەوەری شرۆڤەی د. محەممەد ئەمین (د. ترەیدەر)، پسپۆڕی بازاڕە داراییەکان و محەممەد شێخ فاتیح پێشکێشکاری ئابووری رووداو بوو، شرۆڤە و پێشبینییەکانیان بۆ نرخی دینار بەرامبەر بە دۆلار بوو.

 د. محەممەد ئەمین، پسپۆڕی بازاڕە داراییەکان، کە بە د. ترەیدەر ناسراوە، رایگەیاند، عێراق لە بەردەم دوو سیناریۆدایە کە هەردووکیان کاریگەریی نەرێنییان لەسەری دەبێت، کە یەکەمیان دەستپێکردنەوەی جەنگ و نەوتێکی گرانە، دووەمیشیان بەردەوامیی ئاشتی و نەوتێکی هەرزانە.

دەوڵەتان هەمیشە لە ئەگەری رووبەڕووبوونەوەی سیناریۆ نەرێنییەکاندا بڕیاری نوێ دەدەن تاوەکو خۆیان لەگەڵ دۆخەکەدا بگونجێنن.

د. ترەیدەر پێشبینی کرد، لە داهاتوودا بانکی ناوەندی بە ناچاری دەستکاری نرخی دینار بکات، لە کاتێکدا هەمیشە بانگەشەی بەهێزکردنی دەکات.

بەراورد بە هەفتەی رابردوو نرخی دینار بەرامبەر بە دۆلار دابەزیووە، د. محەممەد ئەمین گوتی، "هیچ هۆکارێک نییە بۆ بەرزبوونەوەی نرخی دینار، بەڵام هۆکار هەیە بۆ دابەزینی".