رووداو دیجیتاڵ
ئاژانسی ئۆپەراسیۆنە بازرگانییە دەریاییەکانی بەریتانیا رایگەیاند، رۆژی دووشەممە کەشتییەکی گوێزەرەوەی نەوت لە نزیک کەناراوەکانی دووبەی بە "تەنێکی نەناسراو" کراوەتە ئامانج و بەو هۆیەوە ئاگر لەنێویدا کەوتووەتەوە.
بەگوێرەی زانیارییەکانی ئەو ناوەندە ئەمنییە دەریاییە، رووداوەکە لە دووریی 50 کیلۆمەتری دەریایی لە باکووری رۆژئاوای دووبەی و لە نزیک تەنگەی هورمز روویداوە.
کۆمپانیای نەوتی کوێت پشتڕاستیکردەوە کە کەشتییەکە سەر بە وڵاتەکەیەتی و نەوتی خاوی بارکردووە. کۆمپانیاکە ئاماژەی بەوەش کرد کە لە کاتی هێرشەکەدا کەشتییەکە نەوتی زۆری پێبووە.
ئاژانسەکەی بەریتانیا رایگەیاند ،تەواوی ئەندامانی تیمی کەشتییەکە سەلامەتن و تاوەکو ئێستا هیچ زیانێکی ژینگەیی بەهۆی رژانی نەوتەوە تۆمارنەکراوە.
لێکۆڵینەوە لە رووداوەکە دەستیپێکردووە و ئاژانسە بەریتانییەکەش هۆشداریی داوەتە کەشتییەکانی دیکە کە لە کاتی هاتووچۆدا لەو ناوچەیەدا بە وریاییەوە بجووڵێن.
