رووداو دیجیتاڵ
رەنگە زۆر جار گوێت لەو بیرۆکە زانستییە بووبێت کە دەڵێت، نەوتی خاو لە ئەنجامی شیبوونەوەی داینەسۆرەکان، گیانەوەرەکانی دیکە و رووەکەکان لە ناخی زەویدا دروستبووە.
بەڵام بیردۆزێکی نوێ هەیە کە تاوەکو دێت، ژمارەیەکی زیاتری زانایان لێکۆڵینەوەی لەسەر دەکەن و لێی رادەمێنن، کە پێی دەگوترێت، "بیردۆزی نەوتی نازیندەیی."
ئەم بیردۆزە دەڵێت، رەنگە نەوت و گاز لە پاشماوەی رووەک و گیانەوەرە کۆنەکان دروست نەبووبن، بەڵکو لە ئەنجامی کارلێکی گەرمی و کیمیاییەوە لە ناخی زەویدا پێکبێن.
بەپێی ئەم بیرۆکەیە، ئەو گەرمی و پەستانە زۆرەی لەنێوان توێژاڵە رەقەکان و ناوکی شلی زەویدا هەیە وا لە کاربۆن و هایدرۆجین دەکات یەکبگرن و بەرەو سەرەوەی زەوی سەربکەون، بەمەش نەوت و گاز دروست دەبن.
ئەگەر ئەمە راست بێت، مانای وایە ئەم سووتەمەنییانە لەوانەیە بەردەوام لەنێو زەویدا دروست ببنەوە، ئەمەش وایان لێدەکات تا رادەیەک وزەی "نوێبووەوە" بن، بەڵام نوێبوونەوەیان پێویستیان بە ماوەیەکی درێژە.
هەرچەندە ئەم بیرۆکەیە هێشتا جێی مشتومڕە و زۆربەی زانایان باوەڕیان پێی نییە، بەڵام ئەو بیروباوەڕە کۆنە دەخاتە ژێر پرسیارەوە کە دەڵێ یەدەگی نەوت سنووردارە و رۆژێک دێت کۆتایی دێت. هەروەها پرسیاری سەرنجڕاکێش دروست دەکات سەبارەت بەوەی کە چۆن کیمیای قووڵایی زەوی رەنگە هێشتا کاریگەریی لەسەر داهاتووی وزەی جیهان هەبێت.
.jpeg&w=3840&q=75)
