چین بە بڕی پێنج ملیار دۆلار وەبەرهێنان لە هەولێر دەکات

 

سامان عارەب، ئەمڕۆ شەممە 10ـی تەمموزی 2021، لە لێدوانێکدا بە تۆڕی میدیایی رووداوی راگەیاند، "پرۆژەکە لەسەر رووبەڕی 2000 دۆنم زەوی دروستدەکرێت، سەرمایەی پرۆژەکە پێنج ملیار دۆلارە، شوێنەکەی لە باکووری رۆژئاوای هەولێر لە هەردوو کەرتی ئاشۆکان و دارەبەند لەسەر رێگەی هەولێر- دهۆک دەبێت، بەپێی ئەو پلانەی پێشکەشکراوە و پرۆژەکە هەلی کار بۆ هەشت هەزار کەس دەرەخسێنێت."

 

سامان عارەب، بەڕێوەبەری گشتیی وەبەرھێنانی ھەولێر باسی لەوەشکرد، "پرۆژەکە ناوی هەپی سیتی دەبێت و بەپێی خشتەی کار کە کۆمپانیاکە پێشکەشی کردووە بڕیارە لە ماوەی پێنج ساڵ تەواو بکرێت و ساڵانەش 14 ملێون گەشتیار سەردانی پرۆژەکە دەکەن."

 

لەبارەی پرۆژەکەوە، بەڕێوەبەری گشتیی وەبەرھێنانی ھەولێر ئاشکرایکرد، پرۆژەکە مەڵتی سێکتەرە واتە سێکتەرەکانی گەشتیاری، بازرگانی، نیشتەجێبوون و کۆمەڵێک شاری یاریی تێدادەبێت، کە بەپێی بەڕێوەبەری گشتیی وەبەرهێنانی هەولێر دەبێتە چوارەم پرۆژەی هاوشێوە لە رۆژهەڵاتی نێوەڕاست دروستبکرێت.

 

لەبارەی کارەکانییەوە، سامان عارەب رایگەیاند، "پرۆژەکە هەندێک قەرەبووکردنەوەی جووتیاران و شوێنێ هاونیشتمانیانی ماوە و بەم نزیکانە بەردی بناخەی دادەنرێت."

 

7ـی ئەم مانگە حکومەتی هەرێمی کوردستان قەبارەی وەبەرهێنانی لە هەرێمی کوردستان راگەیاند، بەپێی ئامارەکان لە دامەزراندنی دەستەی وەبەرهێنان لە 1-8-2006 تاوەکو 20-6-2021، مۆڵەت بە 1126 پرۆژە لە 13 سێکتەری جیاواز دراوە، لەو ژمارەیە ئێستا 980 مۆڵەتیان بە سەرمایەی 57 ملیار و 816 ملیۆن دۆلار کاریان پێ دەکرێت و 146 مۆڵەتیش بە سەرمایەی  16 ملیار و 926 ملیۆن دۆلار هەڵوەشێندراونەتەوە کە بڕیار وایە تاوەکو تەواوبوونى کابینەی نۆیەم و لە سەرووى 200 هەزار هەلى کارى راستەوخۆ و ناڕاستەوخۆش دابین بکرێت.