رووداو دیجیتاڵ
وەزارەتی بازرگانیی عێراق رایگەیاند، ژمارەی کۆمپانیا و پڕۆژە تۆمارکراوەکان گەیشتووەتە نزیکەی 107 هەزار، هاوکات خزمەتگوزارییەکی نوێ خراوەتە کار کە رێگە دەدات لە ماوەی تەنیا یەک رۆژی کارکردندا رێکارەکانی دامەزراندن و تۆمارکردنی کۆمپانیا تەواو بکرێن.
محەممەد حەنوون، راوێژکاری وەزارەتی بازرگانیی عێراق، ئەمڕۆ پێنجشەممە (29ی تشرینی یەکەمی 2026) ئاماری فەرمیی فەرمانگەی تۆماری کۆمپانیاکانی خستەڕوو و بە رووداوی راگەیاند، کۆی ژمارەی کۆمپانیا سنووردارەکان گەیشتووەتە 97 هەزار و 844 کۆمپانیا، لەگەڵ 5 هەزار و 466 کۆمپانیای بیانی، 720 کۆمپانیای هاوبەش، 441 کۆمپانیای پشکداری و 2 هەزار و 498 پڕۆژەی تاکەکەسی. کە کۆی گشتییان دەگاتە 106 هەزار و 528 کۆمپانیا و پڕۆژە.
راوێژکاری وەزارەتی بازرگانی ئاماژەی بەوەدا پلاتفۆڕمێکی ئەلیکترۆنیی تەواوکاری لە فەرمانگەی تۆماری کۆمپانیاکان کارا کراوە؛ لە رێگەیەوە تەواوی قۆناخەکانی مامەڵەکە لە ناونووسینی بازرگانی و رێکارە یاسایی و کارگێڕییەکان و بەستنەوە بە لایەنە پەیوەندیدارەکانەوە، تاوەکو چاپکردنی بڕوانامەی دامەزراندن بەشێوەی دیجیتاڵی و بە سیستەمی پارەدانی ئەلیکترۆنی دەکرێن.
هاوکات بۆ لقی کۆمپانیا بیانییەکانیش، لە رێگەی سیستمی "پەنجەرەی یەکگرتووی ئەلیکترۆنی"یەوە کات و ماندووبوونی کۆمپانیا نێودەوڵەتییەکان کورتکراوەتەوە.
لەبارەی خێرایی راییکردنی مامەڵەکان، حەنوون خزمەتگوزارییەکی تایبەتی بۆ بازرگانان و وەبەرهێنەران خستەڕوو کە دەتوانرێت لە ماوەی "یەک رۆژی کارکردندا" تەواوی رێکارەکانی دامەزراندن و تۆمارکردنی کۆمپانیا جێبەجێ بکرێن، بە مەرجێک سەرجەم پێداویستییە یاساییەکان و بەڵگەنامە داواکراوەکان تەواو بن.
.jpg&w=3840&q=75)