رووداو دیجیتاڵ
رۆژی دووشەممەی رابردوو 22-08-2022 یەختێکی کۆچبەران لە بۆدرومی تورکیاوە بەرەو ئیتاڵیا کەوتووەتەڕێ، بەڵام دوای دوو رۆژ هیچ سۆراخێکی نامێنێت.
پێشڕەو عەبدوڵڵا، نوێنەری پەنابەرە گەڕاوەکانی ئەوروپا بە رووداوی راگەیاند، یەختێکی کۆچبەران کە 71 کۆچبەری هەڵگرتبوو، کە یەکێکیان منداڵێکی شەش ساڵانە، رۆژی دووشەممە لە تورکیاوە بەرەو ئیتاڵیا بەڕێكەوتووە، بەڵام لە رۆژی چوارشەممەوە هیچ سۆراخێکی نەماوە.
میران غەریب، برای دوو کۆچبەرە کە لەنێو یەختەکەدان و بە رووداوی راگەیاند، یەختەکە 71 کۆچبەری هەڵگرتبوو، کە 15یان خەڵکی باشووری کوردستانن و دووانیان خوشک و برای ئەون بە ناوەکانی مەریوان غەریب و شنۆ غەریب، لەگەڵ پوورزایەکی بەناوی کاروان مەمەند، لە رۆژی دووشەممەوە لە بۆدروم بەڕێکەوتوون بەرەو ئیتاڵیا.
برای ئەو دوو کۆچبەرەی نێو یەختەکە گوتیشی، ئەو 15 کەسە خەڵکی رانیە و قەڵادزێ و حاجیاوان، یەکێکیشیان کە ئافرەتە خەڵکی بەکرەجۆی شاری سلێمانییە، "لەنێو کۆچبەرەکاندا 13یان خەڵکی شارەکانی سەردەشت و مەریوانن، ئەوانی دیکەش کۆچبەری ئەفغانستان و ئێرانین."
بە گوتەی میران غەریب، لە رۆژی دووشەممە کاژێر 05:00ی بەیانییەوە یەختەکە لە بۆدروم لە تورکیا بەڕێکەوتووە بەرەو ئیتاڵیا، بەڵام لە کاژێر 02:55 خولەکی نیوەشەوی چوارشەممەی رابردوو، هیچ هەواڵێکیان نەماوە و ناتوانن پەیوەندییان پێوە بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ