رووداو دیجیتاڵ
لە کاتێکدا وێستگەی نێودەوڵەتیی بۆشایی ئاسمان (ISS) بەرەو کۆتایی تەمەنی دەچێت، رووسیا بیر لە پڕۆژەیەکی نوێ و جیاواز دەکاتەوە، ئەویش دامەزراندنی وێستگەیەکە کە بە دەوری خۆیدا دەخولێتەوە و هێزی کێشکردن بۆ ئاسمانەوانان دروست دەکات.
کۆمپانیای "ئینێرجیا"ی رووسیا مافی داهێنانی بۆ دیزاینێکی نوێ وەرگرتووە کە ئامانج لێی چارەسەرکردنی گەورەترین کێشەی تەندروستیی ئاسمانەوانانە.
کێشەکە چییە؟
مانەوە لە بۆشایی ئاسمان بەبێ هێزی کێشکردنی زەوی، زیان بە جەستەی مرۆڤ دەگەیەنێت، ماسوولکەکان لاواز دەکات و ئێسکەکان دەپووکێنێتەوە. لەبەر ئەمە، ئێستا ئاسمانەوانان ناچارن رۆژانە چەندین کاژێر وەرزش بکەن بۆ ئەوەی جەستەیان تێکنەچێت.
چارەسەرە نوێیەکە
بیرۆکە نوێیەکەی رووسیا بریتییە لە وێستگەیەک کە بە بەردەوامی بە دەوری چەقی خۆیدا دەخولێتەوە. ئەم خولانەوەیە هێزێک دروست دەکات کە هاوشێوەی هێزی کێشکردنی زەوییە، بەڵام بە بڕی 50%ی ئەو هێزی کێشکردنەی کە زەوی هەیەتی. ئەمەش وادەکات ئاسمانەوانان بتوانن لەسەر بنی بنکە ئاسمانییەکە بوەستن و وەک ئەوەی لەسەر زەوی بن هەست بە کێشکردن بکەن.
شێوەی وێستگەکە لە تایە یان پانکەیەکی گەورە دەچێ، ژوورەکانی نزیکەی 40 مەتر لە چەقی وێستگەکەوە دوورن و لە هەر خولەکێکدا 5 جار دەسووڕێنەوە.
ئاستەنگەکان
دروستکردنی ئەم وێستگەیە ئاسان نییە و پێویستی بە مووشەکی زۆرە. گەورەترین کێشەش ئەوەیە چۆن کەشتییە ئاسمانییەکان لە وێستگەیەکدا رابگرن (پارک بکەن) کە خۆی بە بەردەوامی لە خولانەوەدایە. هەر هەڵەیەک رەنگە کارەساتی لێ بکەوێتەوە.
داهاتووی وێستگەکە
بڕیارە رووسیا ساڵی 2028 لە وێستگەی نێودەوڵەتیی ئێستا بکشێتەوە و ئەو وێستگەیەش ساڵی 2030 لەنێودەبرێ. رووسیا دەیەوێ پێش ئەوەی وێستگە کۆنەکە تێکبشکێنرێ، بەشە نوێیەکانی خۆی لێ بکاتەوە و لە پرۆژە نوێیەکەیدا بەکاریان بهێنێت.
