رووداو دیجیتاڵ
فرێدریش مێرتس، راوێژکاری ئەڵمانیا دەڵێ، پێناچێت هێرشە سەربازییەکانی ئەمریکا و ئیسرائیل بۆ سەر ئێران ئامانجی گۆڕینی دەسەڵات بپێکن و گومانی خۆیشی لە ستراتیژیی ئەو دوو وڵاتە لە جەنگەکەدا دەربڕی.
رۆژی هەینی، 27ی ئاداری 2026، فرێدریش مێرتس، راوێژکاری ئەڵمانیا لە کۆڕبەندێکدا لە شاری فرانکفۆرتی ئاماژەی بەوە کرد، جەنگی ئەمریکا و ئیسرائیل دژی ئێران هیچ نیشانەیەکی وەستانی پێوە دیار نییە و گوتی، "ئایا بەڕاستی گۆڕینی رژێم ئامانجەکەیە؟ ئەگەر ئامانجەکە ئەوە بێت، پێناچێت بەدی بێت."
راوێژکاری ئەڵمانیا گوتی، هەوڵەکانی پێشوو بۆ گۆڕینی دەسەڵات لە وڵاتان "زۆربەی کات شکستیان هێناوە" و وەک نموونەش جەنگی ئەفغانستانی هێنایەوە؛ گوتیشی، "گومانم هەیە کە ئایا ستراتیژێکی روون هەبێت و ئایا ئەو ستراتیژە بە سەرکەوتوویی جێبەجێ دەکرێت یان نا. بەو پێیە بێت، رەنگە جەنگەکە زۆر زیاتر بخایەنێت."
لە بەشێکی دیکەی قسەکانیدا، مێرتس باسی لە پەیوەندییەکانی وڵاتەکەی لەگەڵ واشنتن کرد و رایگەیاند، ئەڵمانیا وەڵامی رەخنەکانی دۆناڵد ترەمپ، سەرۆکی ئەمریکای داوەتەوە کە داوای لە ئەندامانی ناتۆ کرد بەشداریی ئۆپەراسیۆنەکە بکەن. مێرتس دەڵێت، "ئەمە جەنگی ئێمە نییە" و پێشی وایە ترەمپ لەو هەڵوێستەی بەرلین تێگەیشتووە.
سەبارەت بە تەنگەی هورمز، کە شادەمارێکی گواستنەوەی نەوت و گازە و بەهۆی جەنگەکەوە بە تەواوی پەکیکەوتووە، راوێژکاری ئەڵمانیا ئامادەیی وڵاتەکەی نیشان دا بۆ هاوکاریکردن لە پاراستنی ئاسایشی تەنگەکەدا، بەڵام مەرجی بۆ ئەوە دانا و گوتی، "ئەمە پێویستی بە ئاگربەست، سپاردەیەکی نێودەوڵەتی، رەزامەندیی پەرلەمان و بڕیاری کابینەی حکومەتە کە ئێستا زۆر لەوەوە دوورین."
ئەم لێدوانانەی مێرتس لە کاتێکدایە، گرژییەکانی رۆژهەڵاتی ناوەڕاست چوونەتە قۆناخێکی مەترسیدار و داخستنی رێڕەوە ئاوییەکە کاریگەرییەکی گەورەی لەسەر بازاڕی وزەی جیهانی دروستکردووە.
