رووداو دیجیتاڵ
تەنیا ئەم هەفتەیە نزیکەی 1000 کۆچبەر بە بەلەم لە فەرەنساوە خۆیان گەیاندووەتە بەریتانیا. وەزارەتی نێوخۆی بەریتانیا رایگەیاندووە، پلانێکی نوێیان هەیە بۆ کۆنترۆڵکردنی کۆچ لەڕێگەی نۆکەندی ئینگلیزەوە.
لە ماوەی حەوت رۆژی رابردوودا 956 کۆچبەر بە بەلەمی بچووک و لەڕێگەی نۆکەندی ئینگلیزەوە خۆیان گەیاندووەتە بەریتانیا. وەزارەتی نێوخۆی بەریتانیا ئاشکرایکردووە، 17 بەلەم ئەو نزیکەی هەزار کۆچبەرەیان لە فەرەنساوە گەیاندووەتە ئەوبەری ئاو.
گوتەبێژێکی وەزارەتەکەی بەریتانیا، کە ناوی خۆی ئاشکرا نەکردووە، دەڵێت، "دەمانەوێت کارێک بکەین ئەو پەڕینەوە مەترسیدارانە بە بەلەمی بچووک کۆتاییان پێبێت."
وەکو گوتەبێژەکە باسی دەکات، "حکومەتی نوێی بەریتانیا بڕیاریداوە دامەزراوەیەکی نوێ بەناوی (فەرماندەیی ئاسایشی سنوور) دابمەزرێنێت، کە کۆکەرەوەی دامەزراوەی هەواڵگری و ئاسایشی بەریتانیا بۆ پاراستنی سنوورەکان دەبێت."
دامەزراوەکە سەدان ئەفسەری نوێ وەردەگرێت و ئامادەیان دەکات بۆئەوەی وەکو چۆن هێزەکانی دژەتیرۆر دەستوبرد کار دەکەن، ئاواش ئەو هێزە نوێیە بەسەر قاچاخچییاندا دەدەن و وەکو گوتەبێژی وەزارەتەکە دەڵێت، "چیدیکە ناهێڵن بە ملیۆنان پاوەند لە قاچاخچێتیدا قازانج بکەن."
