رووداو دیجیتاڵ
راپرسییەکی نوێ دەریخستووە، ژمارەیەکی زیاتری ئەمریکییەکان لە شێوازی مامەڵەکردنی دۆناڵد ترەمپ، سەرۆکی وڵاتەکەیان لەگەڵ جەنگی غەززە رازین، بەتایبەت دوای ئەوەی نێوەندگیریی کرد بۆ راگرتنی جەنگ، بەڵام لەسەر کێشە نێوخۆییەکانی وڵاتەکەی، پشتیوانیلێکردنی هێشتا کەمە.
راپرسییەکە کە لە لایەن ئاژانسی ئەسۆشتیەتد پرێسەوە کراوە، ئەوەش رووندەکاتەوە، کە ئەو سەرکەوتنەی ترەمپ پێیوایە لەسەر ئاستی جیهان بەدەستیهێناوە، نەیتوانیوە وا بکات خەڵکی زیاتر لەناوخۆی ئەمریکادا پشتیوانیی لێبکەن.
هەندێک لەو کەسانەی بەشداریی راپرسییەکەیان کردووە، دەڵێن پێویستە ترەمپ زیاتر بایەخ بە کێشەکانی نێوخۆی وڵات بدات، وەک ئابووری، تەندروستی و کۆچ.
بۆ نموونە، جەستن ساندەرز، کۆمارییە و تەمەنی 31 ساڵە و دوو جار دەنگی بە ترەمپ داوە، دەڵێت: "زۆر باشە کە ئاشتی دروست بەرقەرار بکات، بەڵام من دەڵێم: 'پێویستە پێش ئەوەی ئاشتی لە جیهاندا بچەسپێنیت، زیاتر خەمی خەڵکی ئەمریکی خۆت بخۆیت'."
راپرسییەکە دوای راگەیاندنی رێککەوتنی ئاگربەستەکە، بەڵام پێش ئازادکردنی بارمتەکان کراوە. هەرچەندە ئاگربەستە ناسکەکە لە غەززە بەردەوامە، بەڵام هێشتا پرسیاری جیدی هەیە لەسەر پلانی ئەمریکا و ئەگەری بەردەوامبوونی ئاشتییەکە.
هاوکات، ترەمپ لەنێوخۆی وڵاتەکەیدا رووبەڕووی کێشەی گەورە بووەتەوە، وەک:
- داخستنی حکومەت بۆ ماوەی سێ هەفتەیە.
- بەرزبوونەوەی نرخەکان کە ژیانی بۆ زۆر کەس قورس کردووە.
- کەمکردنەوەی خزمەتگوزاریی تەندروستی و داخستنی نەخۆشخانەکان.
بەپێی راپرسییە نوێیەکە، لە هەر 10 کەس، نزیکەی 4 کەس لە شێوازی کارکردنی ترەمپ وەک سەرۆک رازین. ئەم رێژەیەش هەروەک مانگی رابردوو ماوەتەوە و گۆڕانی بەسەردا نەهاتووە.
.jpg&w=3840&q=75)
