لە سوێد دوو گەنجی بێتاوانی کورد لە شەڕی باندە تاوانکارییەکان گیان لەدەستدەدەن

ئێوارەی 14ی نیسان، واتە چوار شەو لەمەوبەر، بە دروستی کاژێر 11:36 خولەک، خەڵکی ناوچەی (بیسکۆپسگۆرتن) لە شاری یۆتۆبۆریی سوێد گوێیان لە دەنگی تەقە دەبێ. پێنج شەش گوللە دەتەقن. ئەو شوێنەی دەنگەکانی لێ بیستراوە پارکێکی ئۆتۆمبێلە. 

خەڵک تەلەفۆن بۆ پۆلیس دەکەن. کاژێر 3:55 خولەک پۆلیس ئاشکرای دەکات کە دوو کەس لە تەقەکردنەکەدا بەرکەوتوون. یەکێکیان تەمەنی نزیکەی 20 ساڵە و ئەوەی دیکەیان 25 ساڵە. دوو ئۆتۆمبێلیش بە تەقەکان زیانیان پێگەیشتووە.

هەردووکیان گەیەندراونەتە نەخۆشخانە، بەڵام برینەکانیان سەخت بوون، بۆیە گیانیان لەدەستداوە. دواتر دەردەکەوێ کەسێکی دیکەش کە تەمەنی نزیکەی 30 ساڵ بووە لەگەڵ دوو کوژراوەکە بووە و بەرنەکەوتووە. ئەو رایکردووە و رزگاری بووە.

بەپێی بەدواداچوونەکانی دیاسپۆرا، ئەو دوو گەنجەی گیانیان لەدەستداوە هەردووکیان کوردن. 25 ساڵەکە خەڵکی باکووری کوردستانە و ناوەکەی نەزاندراوە. 20 ساڵەکە باشوورییە و دیاسپۆرا زانیویەتی لە ماڵباتێکی ناسراوی سلێمانییە. ناوی رێژیر ئومێدە، کە لە سوێد بە رێژیر عەبدولڕەحمان ناسراوە. 

هەر زوو پۆلیس و رۆژنامەی بەنێوبانگی سوێدی (ئافتۆنبلادت) بۆیان دەردەکەوێ کە رووداوەکە شتێکی تەواو نییە: ئەوانەی کە کوژراون هیچ تۆمارێکی تاوانیان لای پۆلیس نییە و پێشتر گومانیشیان لێ نەکراوە کە دەستیان لەگەڵ گرووپە تاوانکارییەکان هەبووبێ. لەو ناوچەیەی ئەو گەنجانە لێی دەژیان، نزیکەی 20 ساڵە شەڕێکی تووند لە نێوان گرووپە تاوانکارییەکانی تێدا هەیە. ئەوانە زۆرتر لە 15 کەسیان لە یەکدی کوشتووە. بەڵام دەرکەوتووە ئەو دوو گەنجە هیچ پەیوەندییەکیان بەو شەڕ و کێشانەوە نەبووە. بەڵکو قوربانییانی تەقەی بەهەڵە بوونە.

ئێستا پۆلیس خەریکی لێکۆڵینەوەیە. تاوەکو ئێستا کەس دەستگیر نەکراوە، بەڵام هەموو ئەوانەی رووداوەکەیان بینیوە، هەروەها کەسوکار و نزیکانی قوربانییەکانیش گفتوگۆیان لەگەڵ دەکرێ بۆئەوەی وێنەیەکی روونتری رووداوەکە لای پۆلیس هەبێ.

ئەمە جاری یەکەم نییە کە لە سوێد گەنجی کورد بە هەڵە، هەندێکیشیان بەهۆی بەشدارییان لە باندە مافیاییەکاندا، دەکوژرێن. پێشتر بۆ دیاسپۆرا چووینە سوێد. لەوێ کارمان لەسەر ئەو دۆسیەیە کرد. دۆسێیەکی هێندە ئاڵۆزە کە پۆلیس و دەوڵەتی سوێدیش لەئاستی دەستەوەستانە و نازانێ چۆن بنبڕی بکات. هەندێک لەو کوردانەی ئەوکات لە دیاسپۆرا قسەیان کرد، دواتر لە رووداوی دیکەدا کوژران. یەکێکیان ناوی حاجی هێرش بوو، کە لە ئۆفیسەکەی خۆی لە ستۆکهۆڵم هەڤپەیڤینمان لەگەڵیکرد و باسیکرد کە چۆن کوڕەکەی بەدەستی ئەو باندانە کوژراوە. مانگەکانی رابردوو، حاجی هێرش خۆیشی کوژرا.

لەم ساڵانەی دواییدا زۆر دایک و باوکی کورد لە سوێد هەوڵدەدەن لەبەر خاتری منداڵەکانیان و بۆ زیندووهێشتنەوەیان باربکەن و بچنە وڵاتی وەک ئەڵمانیا یان شوێنەکانی دیکە.