لە پەیوەندییە نێودەوڵەتییەکانی ئەم سەردەمەدا، میدیای بە توانا چیتر تەنیا ئامرازی گواستنەوەی زانیاری نییە، بەڵکو بێ ئەوەی لە ئیتیک و پرەنسیپەکانی بابەتیبوون و بێلایەنیی میدیایی لابدات، دەتوانێ وەک هێزێکی نەرمی کاریگەر، رۆڵێکی گرنگی سیاسی و دیپلۆماسیش بگێڕێ؛ رەنگە دەستەواژەی گونجاو بۆ پێناسەی ئەم رۆڵە باڵا و نوێیەی میدیا لەم سەردەمەدا، چەمکی «دیپلۆماسیی میدیایی» بێت.
لە سەردەمێکدا کە میللەتان گەر بێ دەوڵەتیش بن، بە مەرجێک میدیایەکی کاریگەر، لێزان و سنووربەزێنیان هەبێت، دەتوانن پرسەکانی خۆیان لە رۆژەڤی بایەخپێدانی جیهاندا جێ بکەنەوە. خۆشبەختانە کورد ئەو میدیا لێزانەی هەیە و دەمێکە کەناڵی (رووداو) لێوەشاوانه ئەو رۆڵە دەگێڕێت.
بێ گەڕانەوە بۆ یادەوەری و ئەو وێستگە گرنگانەی کە تێیاندا رووداو بۆ ئاژانسە جیهانییەکان بووە سەرچاوەی متمانەپێکراوی هەواڵ و رووداوە گەرمەکانی کوردستان، عێراق و ناوچەکە؛ دەکرێ هەر بە سەرنجدان لە ئەدای ئەم دواییەی تۆڕی پەیامنێرانیان لە پایتەختەکانی جیهان، حوزووری بەردەواميان، پرسیاری جەسوورانە و دواندنی راشکاوانەی کارەکتەرە بڕیاربەدەستەکانی جیهان، هەست بەو وەرچەرخانە جۆرییە بکەیت، کە رووداو لە مێژووی گوتاری میدیایی کوردیدا هێناویەتە دی.
بۆ نموونە؛ کاتێک (دیار کوردە) لە کۆنفڕانسە رۆژنامەڤانییەکانی کۆشکی سپیدا، پرسیارە ئەخلاقییەکانی کورد دەربارەی تێکشکانی داعش و هەڵوێستی هاوپەیمانان لە قوربانیدانی کورد ئاراستەی سەرۆکی ئەمریکا دەکات، ئەو تەنیا بەدوای «هەواڵ»دا ناگەڕێت، بەڵکو خەریکی ئەرکێکی نوێی میدیاییە، کە جۆرێکە لە دیپلۆماسیی میدیایی؛ لەو ئەرکەدا پرسیار لە گەڕان بەدوای وەڵامەوە دەگۆڕێت بۆ ئامرازێکی دیپلۆماسيى ئامانجدار.
کاتێک رووداو لەجیاتی هەموو کەناڵە سیاسييهكانی عێراق، وەڵام بۆ پرسیارێکی چارەنووسسازی عێراقییەکان (کە ئەویش کاندیدبوون و نەبوونی نووری مالیکییە) لە دۆناڵد ترەمپ وەردەگرێت، ئیدی میدیای کوردی لەسەر دەستی رووداو لە ئهركى نۆرماڵی میدیاییەوە هەڵدەکشێ بۆ ئاست و ئەرکێکی باڵاتر. ئەو حوزوورە میدیاییە لە غیابی دیپلۆماتکاراندا رووداو دەکات بە میدیایەکی دیپلۆماتکار؛ پرسیارەکانیشی كهم تا زۆر رۆڵيان دهبێت لهو پێداچوونەوهى کە رەنگە دامەزراوەکان و بەرپرسانی ئەمریکا بە گوتار و ههڵوێستهكانياندا بیکەن.
لە رووی پێشكهوتنى پیشەییشەوە، رووداو جیا لەوەی زۆر دەمێکە بازنەی میدیای لۆکاڵی تێپەڕاندووەو رووی لە بەستانداردبوونی جیهانییە، بەم حوزوورە سەرنجڕاکێشەی ئەم دواییەی، پێچەوانەی زۆرینەی میدیا ناوچەییەکان، کە تەنیا وەرگر و گوێزهرهوهى هەواڵن، ئەم بووە بە بەرهەمهێنەری هەواڵ؛ لە پایتەختە گەرم و گرنگەکانەوە رووداو دروست دەکات نەک تەنیا بیانگوازێتەوە.
هەڵبەت پڕۆفیشناڵیی میدیایی، توانای مامەڵەکردن لەگەڵ پرۆتۆکۆڵە نێودەوڵەتییەکان و بوێریی رۆژنامەنووسانە، جگە لە بەرچاوڕوونی و پابەندی بە ئامانجی گەورە و دانەبەزین بۆ ئاستی کێبڕکێی میدیایی نێوخۆیی، رووداویان بەم ئاستە بهرزه گەیاندووەو بۆیەش دەبێ رووداو بەو پرنسیپانەوە هەمیشە پابەند بێت.
سەرکەوتنی ستراتیژییەتی رووداو لە گۆڕینی هاوکێشەی هێزی نەرمی میدیایی لە بەرژەوەندیی گوتاری کوردی لە مەحفەلە نێودەوڵەتییەکاندا، جیا لە پێشکەوتن و پەرەسەندنێکی میدیایی کەموێنە، بەشدارییەکی هێژایە لە بەجیهانیبوون و حوزووری بەردەوامی پرس و پرسیاری کورد لە ناوەندەکانی بڕیاری جیهانیدا. رووداو بەم هەنگاوانە سەلماندی کە: «میدیای بەهێز، دەتوانێ هێز بدات بە قەوارەی سیاسی».
