كاردانەوەكانی دوای دەستگیركردنی حەیدەر شەشۆ، پیشانیداین ناكۆكییەكانی نێوان پارتی دیموكراتی كوردستان و یەكێتی نیشتمانیی كوردستان كۆتاییان نەهاتووە، ئەو ئەقڵیەتەش وەلا نەنراوە كە بووەتە مایەی ماڵوێرانییەكی گەورە بۆ خەڵكی كوردستان و تا بە ئەمڕۆ دەگات میللەت باجەكەی دەدا.
ناحەقمان نییە ئەگەر هەڕەشە و لێدوانەكانی دوای ئەم رووداوە، ئەو بڕوایەی بۆ دروستكردبین كە دووبارەبوونەوەی مێژووی خوێناویی دوێنێمان، نەك هەر ئەستەم نییە، بەڵكو زۆر ئاساییە لە هەر چركە ساتێكدا بەدیبێت.
راستە چەندین ساڵە رێككەوتنێكی ستراتیژی پارتی دیموكراتی كوردستان و یەكێتی نیشتمانیی كوردستانی لە چوارچێوەی حوكمڕانییەكی هاوبەش كۆكردووەتەوە، بەو هۆیەشەوە دۆخێكی تاڕادەیەك گونجاوی كاركردنی پێكەوەیی هێناوەتە كایەوە، بەڵام ئەوەی مایەی نیگەرانییە هێشتا كەسانێك لێرە و لەوێ دڵیان بۆ خراپەكاریی و سڕینەوەی بەرامبەرەكانیان لێدەدا. زۆرن ئەوانەی بە هەمان ئەقڵیەتی سەردەمی شەڕی ناوخۆ بیردەكەنەوە و لە خوایان دەوێت هەرێمی كوردستان، هەر لەت لەتكراو و چەند ئیدارەیی بێت.
قسەی من لەبارەی دەستگیركردنی شەشۆ نییە، مەبەست گوفتاری توند و مەیلی شەڕەنگێزانەی كەسانێكی نێو كایەی سیاسیی هەرێمی كوردستانە. مرۆڤ ئەوەندەی بیر دەكاتەوە، ئەو مەتەڵەی بۆ هەڵنایەت، چۆن دەبێ دوو حیزب، یان گرووپی سیاسی لەسەر ئاستی باڵا وابەستەبوونی خۆیان بە رێككەوتن و كاری هاوبەش دووپات بكەنەوە، كەچی لەسەر ئاستی ئۆرگانەكانی خوارەوە و پەرلەمانتار و كادرەكانی نێو حكومەت، بە نەفەسی شەڕ و زمانی زبر و دوژمنداری مامەڵە بكەن.
پرسیار ئەوەیە، ئایا گوفتار و لێدوانی ئەو كەسانە رەنگدانەوەی سیاسەتی حیزبەكانیانە، یان هەڵقوڵاوی بیرو خەیاڵی خۆیان؟ گەڕان بەدوای وەڵامی ئەو پرسیارە دژوار نییە. گریمان ئەو زمانە گوزارشت و دەرهاوێشتەی ناخی خۆیانە، بەڵام دیوی دیكەی پرسیارەكە ئەوەیە، ئەی بۆچی حیزبەكانیان سنوورێك لە بەردەم ویستەكانیان بۆ پەرتەوازەیی و مەیلیان بۆ فیتنەگێڕی دانانێن و بێدەنگیان ناكەن.
مرۆڤ ئەوەندەی سەر دەبات و دێنێ، لە سیاسەتی بانێكە و دوو هەوای ئەو حیزبانە تێناگات. لەبیرمانە لە سەروبەندی هەڵبژاردنەكانی ساڵی رابردووی ئەنجوومەنی نوێنەرانی عێراق و ئەنجوومەنی پارێزگاكانی هەرێمی كوردستان، دەنگێكی زوڵاڵ دەبیستراو دەیگوت، ئەنجامی هەڵبژاردن قبووڵ ناكەین، چۆن ئەوەی بە خوێن بەدەستمان هێناوە بە ئاسانی بە هەڵبژاردن لە دەستی دەدەین.
ئەوەشمان بینی كە سەركردەیەكی دیار هەڕەشەی دەكرد و دەیگوت دەبینەوە پڵنگەكەی جاران. ئەو چەند رۆژەی دواییش خوێندمانەوە، پەرلەمانتاری حیزبێكی بەشدار لە دەسەڵاتی سیاسیی ئەم هەرێمە، دەڵێت سەرۆكی هەرێم بە سەرۆكی خۆم نازانم و بەلاشمەوە لە خائینێك زیاتر نییە. ئەمە چ سیاسەتێكە؟ تۆ شەریكی حكومەت بیت و بە نەفەسی دوژمنایەتی بدوێی. پێتوابێ بەو زمانە دەتوانی زۆرترین كاریگەرییت لەسەر هەست و نەستی هاونیشتمانیان هەبێ و پلەیەكی باڵاتر لای ئەندام و هەوادارانی حیزبەكەت مسۆگەر دەكەیت. ئەمە رێك مانای ئەوەیە بەشێكیت لە سیستەمی سیاسیی ئەم وڵاتە، بەڵام بڕوات پێی نییە و دانی پێدانانێی.
كەسانێك پاساو بۆ ئەو جۆرە لێدوانانە دەهێننەوە و پەیوەستی دەكەن بە دیموكراسیەت و ئازادیی بیروڕای نێو حیزبەكە. بە پێچەوانەوە ئەوە مانای دیموكراسیەت نییە. تەنیا لە مانای نابەرپرسیارێتی و بێ دیسپلینی ئەو لایەنانەش كورت نابێتەوە. بەڵكو بە مەزندەی من تا رادەیەكی زۆر پشتئەستوورە بە پاشخانی ئەو رق و كینەیەی دەمێكی زۆرە رەگی لەناو كەلتووری حیزبایەتی لای ئێمە داكوتاوە.
لەو بڕوایەدام ئەگەر زمانی زبر و مەیلی شەڕەنگێزی تا ئاستێك لە نێو خەڵكێكی توندڕەوی نێو حیزبەكەت قبووڵكراو بێ، ئەو مانای ئەوە نییە لای زۆرینەی خەڵكی ئاسایی و پەسندبێ، بەڵكو زۆریش ناشیرین و قێزەونە.
هەموو لایەك ئەوە باش دەزانن هیچ شتێك بە قەد دووبەرەكی زیانی بە جەستەی ئەو میللەتە نەگەیاندووە، هەر ئەمەشە وایكردووە كورد وەك نەتەوەیەكی بێ ناسنامە و بێ دەوڵەت بمێنێتەوە.
ئەوەی لێرەو لەوێ روودەدا، پێماندەڵێت هێشتا هەرێمی كوردستان لە دۆخی دوو ئیدارەییدایە و ئەوەی لە بارەی یەكگرتنەوەی هەردوو ئیدارەكەش دەگوترێ، جۆرێكە لە خۆخەڵەتاندن.
بۆ نموونە بە كردەوە دیارە، لەسەر ئاستی دەزگای ئاسایش كەمترین هەنگاو بۆ یەكگرتنەوە نەنراوە. هەر ئەوەندەش نا، دەبینین لە نێو ئاسایشی هەردوولادا، جۆرێك لە حەساسیەت و ململانێ و لێدوانی دژ بە یەكیش هەیە.
كەس نییە ئەوە نەزانێ، لەو بەناو یەكگرتنەوەیەدا ئەو هەیكەلەی بۆ سەرپەرشتیكردنی دەزگای ئاسایش داڕێژراوە، لە واقیعدا بوونی نییە و هیچ لایەك لایەكەی تر ناخوێنێتەوە.
ئەوەی پەیوەندی بە پێشمەرگەشەوە هەیە، دۆخەكە زۆر روونە. هێشتا وەزارەتی پێشمەرگە نەبووەتە چەتری كۆكردنەوەی تەواوی یەكەكانی پێشمەرگە. هێشتا لەم هەرێمەدا هێزگەلێك هەن ئامادەنین لە چوارچێوەی وەزارەتی پێشمەرگەدا خۆیان رێكبخەنەوە و لەلایەن حیزبەكانیان و ئەملاو ئەولاش، كۆمەك و پشتیوانی دەكرێن، نموونەشمان وەك لە روونكردنەوەكەی سەرۆكایەتی هەرێمدا هاتووە، هێزەكەی شەشۆیە لە شنگال.
دەبێ دان بەوەدا بنێین، ئەگەرچی ئێمە بەردەوام ئیدیعای یەكهەڵوێستی و یەكڕیزیی نیشتمانی دەكەین، وەلێ لە جەوهەردا نەك هەر یەك نین، بەڵكو زۆریش ناتەبا و دژی یەكین.
كارەساتێكی گەورەیە، میللەتێك هەموو رابردووەكەی قوربانیدان بووبێ، هەمیشە بە ئاگری شەڕەكان سووتابێ، كەچی هێشتا بە ئەقڵیەتی دوێنێی پڕ لە ئازار و كوێرەوەری بیربكاتەوە. بە داخەوە وەك ئەوەی هیچ نەگۆڕابێ، كورد دەرسی لە شەڕ و ململانێی نێوخۆیی وەرنەگرتووە. بیرمان چووە چۆن و بە چ دەردەسەرییەك گەیشتووینەتە ئەمڕۆ.
