كاتى خۆى كه سهرۆك نێچيرڤان بارزانى پشتگیریی دامەزراندنی تۆڕی میدیایی رووداوی كرد، بۆ ئەوە نەبوو ميديايهكى پشتيوان بۆ خۆى يان بۆ حیزب و حكومهتهكهى دەستەبەر بكات، بهڵكو ئەو پشتگیرییە لە چوارچێوەی هاندان و دەستباری ئهو دامەزراوانەدا بوو كە بۆ سەرخستنی دیموكراسی لە كوردستان دا پێویست بوو دروستببن كە یەكێكیان دامهزراوهى میدیای پیشەییه كه یەكێكه لە سیما گەشەكانی سیستمی دیموكراسی.
سهرۆك نێچيرڤان بارزانى به پشتگيريكردنى رووداو و ئازادیى كاری رۆژنامەوانی بەگشتی، دەیویست بە گەلانی دۆستی كورد بڵێ: خەڵكی كوردستان و هێزە سیاسییەكانی هەر بە درووشم دیموكراتخواز نین و ئەوەتا بە كردەوە روویان له ديموكراتی و ئازادییە، بۆیەش دهتوانن ميدياى لهو جۆره سهرپێبخهن و پشتگيری بكهن و تهحهموليشى بكهن. لەم پێودانگەوە، رووداو هەر لە دەسپێكەوە نهك تهنیا وهك كهناڵيك، بهڵكو وهك دامەزراوەیەك هاته مهيدان كه ئهركى گرنگی لە پرۆسەی دیموكراتیزەكردنی كوردستان دا كەوتە ئەستۆ وەك: دابينكردنى مافى ئاگالێبوون بۆ هاووڵاتیيان، دابينكردنى مينبهر بۆ بيروڕا جياوازهكان، بڵاوكردنەوەی كولتووری گوێ لێكدی گرتن، جگە لە ئەركە میدیاییەكەی كە ئەویش گواستنهوهى راست و دروست و بێ لايهنانهى ههواڵ و زانياريهكان بوو بۆ خهڵك تاوەکو بتوانن لهبهر رۆشنايى زانيارى دروست دا، ههڵوێستى دروست وهربگرن و چهواشه نهبن.
رووداو وهك ئهزموونێكى نوێ، ئەگەرچی بێ ههڵه و كهم وكورتى نهبوو، بەڵام لە بە جێگەیاندنی ئەركەكەیدا هەر زوو كەوتە سەر راستەڕێی سەركەوتن: له ئاستى ناوخۆدا بوو بەو سەكۆیەی كه پهرهپێدانى كولتوورى دیموكراسى دهيخواست، له ئاستى جیهانییشدا بوو بەو دامەزراوە رێزلێگيراو و سەرچاوە متمانهپێكراوەی بۆ گواستنهوهى وێنهى راستهقينه و بێ رتووشى كوردستان و تهنانهت عێراق و ناوچهكهش، پشتی پێبەسترا.
ئەم خۆسەلماندن و سەركەوتنەی رووداو ئاسان و بێ كێشە و سەریەشە نەبوو، بەڵام لەوەشدا واقعبینانە هەڵسوکەوتی لەگەڵ كێشە و سەرئێشە و لێكنەگەیشتنەكان كرد و ئەو راستییەی لەبەرچاو گرت كە كوردستان وەك هەر سەرزەوینێك كە پرۆسەی بەدیمكراسیبوون تێیدا پڕ ئاستەنگ و خاوە و هەنگاوەكانی سستن، زەحمەتە بۆ حیزب و ناوهند و هێزه كۆمهڵايهتييهكانی وا بە ئاسانی دهستوپهنجه لەگەڵ میدیایەك نهرم بكهن و تهحهمولى بكهن كە ههواڵ و راستييهكان، وهك خۆى و بێ خاترگرتن و دڵڕاگرتنی هيچ لايهكیان، بڵاوبكاتهوه و هیچ راستییەك نەشارێتەوە و هیچ دزێوییەك ئارایش نەكات. رووداو واقعبینانە بەرگەی تووڕەیی و ناڕەزاییەكانی ئەو هێز و ناوەندانەی گرت، بەڵام لە هەمان كاتیشدا لە بنهما و پرنسیپە پيشهييهكانی لاینەدا كە سەرئەنجام بووە مایەی لەدەستنەدانی ئهو نێوبانگ و متمانه ناوخۆيى و جيهانييهى بهدهستيهێنابوو.
بوارێكی دیكە كە رووداو چەند ساڵێكە بۆ خۆی كردووەتە ئەرك، بايهخدانە به تۆماركردنى سهربورده پڕ ئهزموون و نەبەردییە ئیلهلمبەخشەكانی تێكۆشەران و تۆماره نيشتمانى و نهتهوهييهكانی گەلی كوردستان وهك ئهو دۆكۆمێنتارييهى پێش چهند رۆژێك لهسهر خهبات و ئهزموونى مامۆستای ديپلۆماتكارانی كوردستان موحسين دزهيى نمایش كرا. رووداو به بهرههمهێنانى ئهو جۆره فيلمانە، جيا له بايهخه نيشتمانى و مێژووييهكهى، دهيهوێت ئهو نهريتهش بچهسپێنێ كه تێكۆشهرانى ميللـهتهكهمان تاوەکو له ژياندا ماون، پێزانينى گەلەكەیان هەست پێ بكەن و خاترجهم بن كه رهنجيان بهخهسار نهچووه. لهلايهكى ديكهشهوه و ههر وهك سهرۆك نێچيرڤان بارزانى له رێوڕەسمی نمايشهكهدا ئاماژهى پێدا: ئهم جۆره بهرههمانهى رووداو، گواستنهوهى ئهزموون و وانهكانى مێژووه بۆ نهوهى نوێ.
من دڵنیام جگه له دەستخۆشیی بينهران، هەموو تێكۆشهرانى هاوتهمهن و هاوسهنگهر و ههڤاڵه دێرينهكانى مام موحسين (ئهگهرچى له نمايشى فيلمهكهدا ئامادەنهبوون) بهڵام لە ناخەوە ستایشی كارەكەیان كردووە و هيواى بهردهوامييان بۆ رووداو خواستووه لەو ئەركە سەنگین و گەورانەدا.
رووداو هەر لە دەستپێكەوە بە گەورەیی و بۆ كار و ئامانجی گەورە هاتەمەیدان و لەوكاتەوە كەوتووەتەڕی هەر گەورە و باوەڕ بەخۆ و سەنگینە، دەشبێ ئهو پێگهيەی خۆى بپارێزێ و وەك هەمیشە بە كارى وهك خۆى گهورهوه سهرقاڵ بێ و نهپهرژێته سهر كارى بچووك.
