كاردانەوەی نێودەوڵەتی و جیهانی لەسەر هەڵبژێردرانی نێچیرڤان بارزانی وەك سەرۆكی هەرێمی كوردستان، سوپرایزێكی سیاسی زۆر گەورەبوو. لەكاتی وەرگرتنی پۆستە تازەكەیدا، نەك وەك سەرۆكی هەرێمێك یان سەرۆك دەوڵەتێكی ئاسایی، بەڵكو وەك سەرۆكێكی جێگەی رێزی جیهان، پەیامی پیرۆزبایی و پشتیوانی هەر چوار لای جیهانی بەسەردا بارین. ئەو پشتیوانییە بەرفراوانە كە وڵاتانی ئەفریقیاشی گرتەوە، وەك دەستپێكردنی قۆناخێكی تازەی سیاسی بۆ كوردستان لە ئاستی نێودەوڵەتیدا لێكدەدرێتەوە.
ئەو پشتیوانییە بەهێز و بەرفراوانە، دەرفەتێكی گەورەیە بۆ كوردستان و دۆزەكەی. بەڵام رێگەی سوود وەرگرتن لەو پشتیوانییە بە ئارامی و دۆخێكی تەندروستی سیاسی و ئیداری ناوخۆیی و بەهێزی ئابووریدا تێدەپەڕێت. ئەگەر ئەو زەوینەیە هەبێت، نێچیرڤان بارزانی دەتوانێت بەو پشتیوانییە بەهێزەوە پێگەی كورد لە عێراق زۆر بەهێزبكاتەوە. ئەو پشتیوانییە بەهێزە جیهانییە وادەكات عێراقیش سوود لەو پشتیوانییە وەربگرێت و پەیوەندییەكانی عێراقیش لەگەڵ دەرەوە بەهێزبكات، ئەگەر زەوینەی لەلایەن حكومەتی عێراقەوە بۆ دروستبكرێت.
رۆژی 10ی ئەو مانگە نێچیرڤان بارزانی، سەرۆكی هەرێمی كوردستان وەك یەكێك لە دیدارە گرنگەكانی (دیداری گرنگی دیكەیشی بەدوادا دێن)، لە كۆشكی ئیلیزێ گفتوگۆ لەگەڵ سەرۆكی بەهێزی فەرەنسا و سەرۆكێكی بەهێزی ئەوروپا و جیهان دەكات. گفتوگۆیەكان لە ئیلیزێ زۆر تایبەت دەبن. چونكە نێچیرڤان بارزانی ئەو هەستە وەفادارییەی هەیە كە رۆژی 2/12/2017 كردنەوەی دەرگای ئیلیزێ بۆ ئەو، نیشانەی تێكشكاندنی ئەو ئابلووقە سیاسی و ئابوورییە بوو، كە حكومەتی ئەوكاتی عێراق دەیویست بەهۆیەوە بە بێدەنگی كۆتایی بە حكومەتەكەی و قەوارەی هەرێمی كوردستان بێنێت. رۆڵی نێچیرڤان بارزانیش بۆ ئیمانوێل ماكرۆن، زۆر بالكێشبووە، لەبەرئەوەش هەڵبژێردرانی وەك سەرۆكی هەرێمی كوردستان بە "قوناخێكی گرنگ"، بۆ "هەرێمی كوردستان" و "هەموو عێراق" لێكدایەوە لە پەیامی پیرۆزباییەكەیدا.
پەیوەندی نێوان ئەوروپا و كوردستان بەهۆی شەڕی داعش بەهێزتربوو، ئەو بەهێزییە بەهۆی بایەخی ستراتیژی كوردستان لە بەرەنگاربوونەوەی تیرۆر و پاراستنی ئاسایشی جیهان لەساڵانی داهاتووشدا دەمێنێتەوە. هەروەهاش دروستبوونی بناخەی پیشەسازی نەوتیی و وزە لە كوردستان و دروستبوونی پەیوەندی ئابووری لەگەڵ ئەوروپادا. ئەو پەیوەندییانە، كوردستان دەخەنە قۆناخێكی بەهێزتر و پێگەیەكی زۆر گرنگترەوە.
كۆشكی ئیلیزێ، یادەوەرییەكی گرنگی هەیە لەلای كورد . چونكە ئیلیزێ بوێری پشتیوانیكردنی كوردی بردە ئەودیوی بەرژەوەندییە سیاسی و ئابوورییەكانەوە، كاتێك پێویستیی دروستكردنی "هەرێمی نەفڕین"ی بە پڕۆژە بڕیاری 688ی بردە ئەنجوومەنی ئاسایشی نێودەوڵەتی، بۆ پاراستنی كورد. بەو بڕیارە كێشەی كورد بۆ یەكەمجار بەشێوەیەكی فەرمی لە ئاستی نێودەوڵەتیدا بووە كێشەیەكی سیاسی دانپێدانراو، هەروەها گرەنتییەكی نێودەوڵەتیش بۆ خۆبەڕێوەبردنی كورد دروستبوو.
ئەو بڕیارە پاراستنی گەلانی لە دەست رژێمە دیكتاتۆرییەكانیان بردە قۆناخێكی دیكەوە لە هەموو جیهاندا. چونكە بە بڕیاری 688، بنەمای "دەستتێوەردانی مرۆیی" بۆ پاراستنی گەلانی نێو چوارچێوەی وڵاتان لە دەست حكومەتە چەوسێنەرەكانیان بردە واری جێبەجێكردنەوەو لە یوگسلاڤیا و وڵاتی دیكەشدا جێبەجێكرا.
پێشنیازكاری ئەو بنەمایە بێرنارد كۆشنێری دۆستی كورد بوو، كە لە كۆنگرەی نێونەتەوەیی ئەنستیتۆی كورد لەپاریس لەساڵی 1989دا سەبارەت بە چارەسەری كێشەی كورد، ئەو بنەمایەی پێشنیازكرد.
نێچیرڤان بارزانی و ماكرۆن، ئەمڕۆ بە بنچینەگرتن لە چۆنیەتی دروستكردنی هاوبەشییەكی جیهانی بۆ جێگیركردنی پاراستنی ئازادی و ئاسایشی جیهان لەدوای شەڕی داعشەوە، گفتوگۆ دەكەن لەسەر دروستكردنی نێوكۆییەكی جیهانی لەسەر بەهێزكردنی گفتوگۆی ئاشتیانە و بەرفراوانكردنی بەرژەوەندییە هاوبەشەكان لە رۆژهەڵاتی نێوەڕاستی شڵەژاودا، چونكە هەردووكیان باوەڕیان بەهاوبەشییە نەك شەڕ و هەروەها باوەڕیان بە تواناكانی یەكترە. ئەو باوەڕە گەورەیەی لەنێوان هەردوولادا دروستبووە وادەكات گفتوگۆ لەسەر پرسی گەورە و هەستیار بكەن.
