رەنگە كەسانێك وای بۆ بچن هەڵكوتانە سەر ئەوانەی وەك تۆ بیر ناكەنەوە، جۆرێكە لە دڵسۆزی بۆ سەرۆك، یان ئەو رێبازەی شوێنی كەوتووی. بێ ئاگا لەوەی ئەوەی تۆ دەیكەیت، نەك هەر خزمەتی رێبازەكەت ناكات، یان مانای خۆشەویستی و دڵسۆزیی نییە بۆ سەرۆك، بەڵكو زۆریش زیانبەخشە.
رەنگە ئەو دوو پەرلەمانتارەی هێرشیانكردە سەر پەرلەمانتارەكەی گۆڕان رووداوەكە وا وێنا بكەن، لە سۆنگەی دڵسۆزییان بۆ سەرۆكی هەرێمی كوردستان پەنایان بردووەتە بەر ئەو رەفتارە نادیموكراسییە، بەڵام لە راستیدا واقیعەكە شتێكی دیكەیە.
ئەوەی تۆزێك ئاگاداری دونیای سیاسەت و ململانێی دیموكراسی بێت، باش لەوە تێدەگات هیچ بەرژەوەندییەكی بارزانی لە رەفتارێكی وادا نییە. ئەوەی روویداوە، لە خۆنواندنێكی ناشیرین بترازێ، هیچی دیكە نییە.
ئەگەر وای لێكبدەینەوە ئەو رووداوە بە دڵی بارزانییە، دەكەوینە هەڵەیەكی زەقەوە. دڵنیام سەرۆك بارزانی نەك تەنیا ئارەزووی لەو جۆرە بەرگریە كوێرانەیە نییە، بەڵكو زۆریش دڵگرانی كردووە.
پرسیار ئەوەیە، ئایا بە رەخنەگرتن و قسەكردن لەسەر درێژكردنەوەی ماوەی سەرۆكایەتی سەرۆكی هەرێم چی روودەدا؟ لەو بڕوایەدام نەك هیچ روونادا، بە پێچەوانەوە ئەوەی دەگوترێ، نیشانەی دیموكراسییە و خزمەت بە ئەزموونی دیموكراسی هەرێمی كوردستان و خودی بارزانی و پارتی دەكات.
سەیرە ئەگەر پێمان وابێ قسە و رەخنەی ئەم و ئەو لە میدیا، رۆڵی لە یەكلاكردنەوەی چارەنووسی بارزانی دەبێ. راستە هەر بڕیارێك لە بارەی ئایندەی سەرۆكایەتی سەرۆكی هەرێم، لە پەرلەمان یەكلا دەكرێتەوە، بەڵام ئەوە ئیرادەی ئەندام پەرلەمانەكان نییە بڕیاری كۆتایی لێدەكەوێتەوە، بەڵكو ئەوە كۆبوونەوەی ژوورە داخراوەكانی سەركردایەتی سیاسیی هەرێمی كوردستانە رۆڵی یەكلاكەرەوە دەبینێ. ئەوەی بۆ بەشی زۆری پەرلەمانتارەكانیش دەمێنێتەوە، تەنیا دەست هەڵبڕینە.
بەو پێیەی پەرلەمانتار نوێنەری خەڵكە، پێویستە بە كردەوە نموونەی كەسایەتییەكی جوان بەرجەستە بكا، ئاگاداری هەڵسوكەوتەكانی بێ، دوور بێ لە دەمارگرژی، پارێزگاری لە هەنگاوەكانی تەبایی و ئاشتەوایی سیاسی و كۆمەڵایەتی بكا. ئەوەی لێرەو لەوێ لەسەر دەستی عەوام خراپ و لەقكراوە، ئەو چاكی بكاتەوە.
لەگەڵ ئەو بۆچوونە كۆك نیم كە پەلاماردانی یەكتر و توندوتیژی نێو پەرلەمان بە ئاسایی دەزانێ. پەرلەمان پلاتفۆرمی گفتوگۆ و یەكلاكردنەوەی پرسەكانە لە رێگەی عەقڵ و لۆژیكەوە، نەك لە رێگەی فەوزا و شەڕی دەستەویەخە.
خەڵكی كوردستان تاڵاوێكی زۆری بەدەست ململانێی نێوخۆیی چەشتووە، پەلاماردانی یەكتر و زمانی زبر، مانایەكی نییە، جگە لە دووبارەكردنەوەی دیمەنە ئازاربەخشەكان.
نابێ چاوەڕوانیی ئەوە بكەین، هەموو تاكەكانی كۆمەڵگە وەك یەك بیربكەنەوە و وەك یەك بدوێن، نەمازا لەسەر ئاستی نوخبەی سیاسی. ئەوەی رەخنەش دەگرێ مانای ئەوە نییە ناحەز و خوێنەخۆرە.
ئەگەر ئیدیعاكانمان لەبارەی دیموكراسیبوونمان راست بێ، نابێ لە رەخنە، یان بۆچوونی جیاواز بترسێین. ئەگەر راست دەكەین جیاوازین و شانازی بە خەبات و قوربانییەكانمان بۆ هێنانەدی ئازادی و دیموكراسی دەكەین، دەبێ گوێ لە هەموو دەنگێكی ناڕازی و تووڕە بگرین و بەدوای چارەسەریدا بگەڕێین، نەوەك بە وەڵامدانەوەی ناشارستانی، ناشیرینی بەرهەمبهێنین.
میللەتی زیندوو، میللەتی خاوەن هەڵوێست و پرسیارە. ئەمڕۆ دوێنێ نییە، خەڵكی كوردستان هەرگیز ئارەزووی گەڕانەوە بۆ رۆژگارە تاریكەكان ناكات. كورد خەباتی بۆ ئەوە نەكردووە لە هەنگاوەكانی بۆ دیموكراسی پاشگەزبێتەوە. كورد نەیویستووە میللەتێكی دەستەمۆ و مردوو بێ. بۆیەشە ئەوی تا ئەمڕۆ شانازی پێوە دەكات خەباتی درێژخایەنێتی بۆ دیموكراسی. ئەمە جیاوازیی كورد لەگەڵ بەشە زۆرەكەی دیكەی عێراق دەردەخات.
ئەحمەد تەدین لە پێشەكی كتێبی (كۆماری ترس) ی كەنعان مەكییەدا، پێیوایە كارەساتی عێراقییەكان لەوەدایە بە چەشنی مێگەل خۆیان دەنوێنن و دەڵێت "رێككەوتننامەی جەزائیر ئیمزا دەكرێ، خەڵكی دەڕژێنە سەر شەقام و سەما دەكەن. رێككەوتننامەكە هەڵدەوەشێتەوە، دیسان هەمان كۆمەڵ بۆ سەماو هەڵپەڕكێ دەڕژێنە سەر شەقامەكان. عێراق هێرش دەكاتە سەر ئێران دیسان ئەو خەڵكە بە سەماو شایی دەچنەوە سەر شەقامەكان. شەڕ دەوەستێ دیسان شەقامەكانی عێراق دەبنەوە گۆڕەپانی سەما و هەڵپەڕكێ. عێراق كوێت داگیر دەكات خەڵكی سەرقاڵی سەما و هەڵپەڕكێی خۆیان دەبن، كاتێك بە زەبری هێز لە كوێت دەكرێتە دەرەوە، دیسان خەڵكی دەكەونەوە سەما".
بە پێچەوانەی ئەو دیمەنە، كورد نایەوێ كۆمەڵێكی مردووی بێ دەنگ و یەكڕەنگ بێ. نەك هەر رەخنەگرتن و رای جیاوازی بەلاوە قبووڵە، بەڵكو بەلایەوە زۆریش گرنگ و دڵخۆشكەرە.
ئەوەی ئێمە لە رژێمە توندڕەوەكانی دەڤەرەكە جیادەكاتەوە، یەكتر قبووڵكردن و ئازادیی بیروڕا و دیموكراسییەتە. دونیا جوانییەكانی ئێمە، لە لێبووردەیی و دیموكراسیبوونمان دەبینێتەوە.
نابێ پێمانوابێ ئەوەی لێرە دەگوزەرێ كەس نایبینێ، هەموو لایەك چاوی تێمانبڕیوە و بە تاقیكردنەوەیەكی سەختدا تێدەپەڕین. بەبێ باوەڕبوونی تەواومان بە دیموكراسی و پاراستنی پرەنسیپەكانی مافی مرۆڤ و گرووپگەلی ئەتنیكی و ئاینی و مەزهەبی و ئازادیی سیاسی و رۆژنامەڤانی، ناتوانین هیچ شتێك بەدەست بهێنین.
لەو ئانوساتەدا كە كوردستان لەگەڵ دوژمنێكی دڕندەی وەك داعش لە شەڕێكی سەختدایە، لە هەموو كاتێك زیاتر پێویستی یەكڕیزی و تەبایی نێوخۆیی، خۆی دەسەپێنێ. كۆتاییهاتنی قەیرانەكانی ئەمڕۆ و بنیاتنانی پایەكانی دواڕۆژیكی گەش، بێ یەكگرتوویی و یەكهەڵوێستی هەموو هێز و لایەنە سیاسییەكان، نەك هەر دژوارە، بەڵكو لە مەحاڵ نزیكە.
