![ژان نۆیل بارۆ، وەزیری دەرەوەی فەرەنسا [لای راست] و ئەسعەد شەیبانی، وەزیری دەرەوەی سووریا.](/_next/image?url=https%3A%2F%2Fimages.rudaw.net%2Fs3%2Frudaw.net%2FContentFiles%2F932047Image1.jpg&w=3840&q=75)
رووداو دیجیتاڵ
ژان نۆیل بارۆ، وەزیری دەرەوەی فەرەنسا لە دووەم سەردانیدا بۆ دیمەشق دوای رووخانی دەسەڵاتی ئەسەد، جەختی لەسەر پشتگیریی وڵاتەکەی بۆ جێبەجێکردنی تەواوەتیی رێککەوتنی نێوان حکومەتی کاتی و هەسەدە کردەوە و رایگەیاند، پاراستنی ئاسایشی فەرەنسا پەیوەستە بە تێکشکاندنی تیرۆر لە ناوچەکەدا.
وەزیری دەرەوەی فەرەنسا ئاماژەی بەوە کرد، پاریس و سەرۆککۆماری فەرەنسا رۆڵێکی سەرەکییان گێڕاوە لە دۆزینەوەی چارەسەری سیاسی بۆ ئەو ئاڵۆزییانەی لە باکووری رۆژهەڵاتی سووریا دروستبووبوون. بارۆ گوتی: "ئێستا کە دەوڵەتی سووریا کۆنترۆڵی هەموو خاکەکەی کردووەتەوە، هاتووم تاوەکو لەگەڵ دەسەڵاتداران باسی رێگەکانی بەردەوامیی شەڕی دژی داعش بکەم."
پابەندبوون بە مافەکانی کورد
بارۆ، جەختی لە گرنگیی جێبەجێکردنی تەواوەتیی رێککەوتنی 29ی کانوونی دووەم کردەوە، کە تێیدا تێکەڵکردنی هێز و ئیدارەی کورد لە ناو هێزە ئەمنییەکان و دەزگەکانی دەوڵەتدا چەسپێنراوە. ئەو گوتی: "پێویستە مەرسوومی سەرۆکایەتی بۆ دانپێدانان بە مافی زمان، کولتوور و پەروەردەیی کورد جێبەجێ بکرێت. چەندین هەنگاوی گرنگ ماون، لەوانە دیاریکردنی بەرپرسانی کورد لە ناو دەزگەکانی دەوڵەت، مەشقپێکردنی لیواکانی سەر بە هەسەدە و گەڕانەوەی ئاوارەکان."
وەزیری دەرەوەی فەرەنسا بڕیارە هەر ئەمشەو لە هەولێر لەگەڵ سەرکردایەتیی کورد کۆببێتەوە.
ئاسایشی فەرەنسا و شەڕی داعش
بارۆ ئاماژەی بەوەکرد 10 ساڵ لەمەوبەر هێرشەکانی (باتاکلان) لە پاریس، لە ناو خاکی سووریاوە لەلایەن داعشەوە پلانڕێژییان بۆ کرابوو، بۆیە ئاسایشی فەرەنسییەکان لێرەدا یەکلایی دەبێتەوە. ئەو گوتی: "فەرەنسا 10 ساڵە بێ بەزەییانە شەڕی داعش دەکات و بەردەوامیش دەبێت. بڕیارە رۆژی دووشەممەی داهاتوو هاوپەیمانیی نێودەوڵەتی لە ریاز کۆببێتەوە."
بنیادنانەوە و هاوکاریی دوولایەنە
لە بەشێکی دیکەی قسەکانیدا، بارۆ باسی لە ئارەزووی وڵاتەکەی کرد بۆ بەردەوامیی پشتگیریکردنی گواستنەوەی سیاسی لە سووریا و بەهێزکردنی هاوکارییەکان لە هەموو بوارەکاندا. ئاماژەی بەوە کرد، کار دەکەن بۆ کاراکردنی ئەنجوومەنی کارزانیی فەرەنسا-سووریا و گەڕانەوەی پارە و موڵکە دزراوەکانی گەلی سووریا بۆ هاووڵاتییان، هەروەها پەرەپێدانی هاوکارییە پەروەردەیی و کولتوورییەکان.
لە کۆتاییدا بارۆ جەختی کردەوە، بنیادنانەوەی سووریا و گەڕانەوەی کۆمەڵگەی نێودەوڵەتی بۆ ئەو وڵاتە تەنیا بە پاراستنی ئاسایش و سەقامگیری و بەردەوامیی شەڕی دژی داعش دەبێت، کە ئەوەش لە خاڵی لەپێشینەی کارەکانی فەرەنسادایە.
