رووداو دیجیتاڵ
سەرۆکایەتیی پەرلەمانی عێراق رۆژی 11ی نیسان دیاری کرد بۆ ئەنجامدانی هەڵبژاردنی سەرۆککۆمار و داوای لە سەرۆکی لایەنە سیاسییەکان کردووە، حکومەتێک پێکبهێنن بتوانێت رووبەڕووی ئاڵنگارییەکان ببێتەوە.
ئەو بڕیارەی دەستەی سەرۆکایەتیی پەرلەمانی عێراق لە کۆبوونەوەی لەگەڵ سەرۆکی فراکسیۆنەکان دراوە.
دووشەممە 30ی ئاداری 2026، سەرۆکایەتیی پەرلەمانی عێراق لە راگەیێندراوێکدا ئاماژەی بەوە دا، رۆژی 11ی نیسان دیاریکراوە بۆ ئەنجامدانی دانیشتنی پەرلەمان بۆ هەڵبژاردنی سەرۆککۆمار.
سەرۆکایەتیی پەرلەمان داوای لە سەرۆکی لایەنە سیاسییەکان کردووە، بەرپرسیارێتییەکانیان لە ئەستۆ بگرن بۆ تەواوکردنی بەرکەوتە دەستوورییەکان و پێکهێنانی حکومەتێک کە بتوانێت رووبەڕووی ئاڵنگارییەکان ببێتەوە.
دیاریکردنی ئەو رۆژە بۆ هەڵبژاردنی سەرۆککۆمار لەدوای کۆبوونەوەی هاوپەیمانیی چوارچێوەی هاوئاهەنگیی شیعەکان بوو، کە یەکێک لە ئەجێندای کۆبوونەوەکە باسی هەڵبژاردنی سەرۆککۆمار بوو.
هاوپەیمانیی چوارچێوەی هاوئاهەنگی 29ی ئاداری 2026 لە راگەیێندراوێکدا بە گرنگی زانی پەلە بکرێت لە بەجێهێنانی بەرکەوتە دەستوورییەکان و داوای لە لایەنە سیاسییەکان کرد، پرسی سەرۆککۆمار یەکلا بکەنەوە و دوا وادەی ئەنجامدانی دانیشتنی پەرلەمان بقۆزنەوە بۆ دانانی سنوورێک بۆ ئەو دۆخەی بە "پەککەوتوو" ناوی براوە.
ئەو هەنگاوەی سەرۆکایەتیی پەرلەمانی عێراق لە کاتێکدایە، زیاتر لە 220 پەرلەمانتار واژۆیان بۆ ئەنجامدانی دانیشتنی پەرلەمان بۆ هەڵبژاردنی سەرۆککۆمار کۆکردبووەوە.
