رووداو دیجیتاڵ
بڕیارە سبەی سێشەممە، ئەنجوومەنی وەزیرانی عێراق کۆببێتەوە و تێیدا راپۆرتێک لەبارەی پابەندییە داراییەکانی نێوان حکومەتی هەرێمی کوردستان و حکومەتی فیدراڵی بخرێتەڕوو.
سەرچاوەیەکی باڵا لە ئەنجوومەنی وەزیرانی عێراق، ئەمڕۆ دووشەممە 25-08-2025، بە تۆڕی میدیایی رووداوی راگەیاند، دوو بڕگەی نوێ وەک پاشکۆ خراونەتە نێو کارنامەی کۆبوونەوەی سبەی ئەنجوومەنی وەزیران کە کاژێر 01:00ـی دوای نیوەڕۆ بەڕێوەدەچێت.
بە گوتەی سەرچاوەکە، هەردوو بڕگەکە لەسەر داوای وەزارەتی دارایی عێراقە، یەکێکیان تایبەتە بە خستنەڕووی پابەندییە داراییەکانی نێوان حکومەتی هەرێمی کوردستان و حکومەتی فیدراڵی. بۆ ئەو مەبەستەش، راپۆرتێکی هاوبەش لەلایەن محەممەد عەلی تەمیم، جێگری سەرۆکوەزیران و وەزیری پلاندانان؛ تەیف سامی، وەزیری دارایی و بەنگین رێکانی، وەزیری ئاوەدانکردنەوە و نیشتەجێکردن و شارەوانییەکان پێشکێش دەکرێت.
سەرچاوەکە ئاماژەی بەوەکرد، لەسەر بنەمای ئەو راپۆرتە چاوەڕوان دەکرێت سبەی ئەنجوومەنی وەزیران بڕیار لەسەر ناردنی مووچەی فەرمانبەران و مووچەخۆرانی هەرێمی کوردستان بدات.
تاوەکو ئێستا فەرمانبەران و مووچەخۆرانی هەرێمی کوردستان مووچەی مانگی 6ـی ئەم ساڵیان وەرنەگرتووە، لەکاتێکدا لە عێراق دابەشکردنی مووچەی مانگ 8 دەستیپێکردووە.
سەرچاوەکەی رووداو ئاماژەی بەوەشکرد، بڕگەکەی دیکەی نێو کارنامەی کۆبوونەوەکەی ئەنجوومەنی وەزیران، تایبەتە بە تاوتوێکردنی رێککەوتنی قەرزی پڕۆژەی وێستگەی کارەبای (132 K.V) بۆ بەستنەوەی کارەبای نێوان عێراق و ئوردن (قۆناخی دووەم)، لەگەڵ کۆمپانیای جەنەراڵ ئێلێکتریک.
