رووداو دیجیتاڵ
زیاتر لە 2.4 ملیۆن کارتی دەنگدان بۆ دابەشکردن ئامادەن و سبەی چوارشەممە دابەشکردنی بەشی یەکەمیان لە عێراق و هەرێمی کوردستان دەستپێدەکات.
جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق ئەمڕۆ سێشەممە 23ی ئەیلوولی 2025 بە تۆڕی میدیایی رووداوی رایگەیاند، دوو ملیۆن و 471 هەزار و 61 کارتی دەنگدان بۆ دابەشکردن ئامادەن.
گوتەبێژی کۆمیسیۆنی هەڵبژاردنەکانی عێراق گوتی، لیژنەی پشکنینی کارتی دەنگدان لە سەرجەم نووسینگەکانی هەڵبژاردن لە پارێزگاکانی عێراق، بە هەرێمی کوردستانیشەوە، پێکهێندراوە و کارمەندانی بنکەکانی تۆمارکردن پرۆسەی پشکنین و وردبینییان تەواو کردووە.
جومانە غەلای ئاماژەی بەوەش کرد، ئەم بەشەی کارتی دەنگدان بەسەر سێ پۆلدا دابەش دەبێت کە بەم جۆرەیە:
دەنگدانی گشتی: 2,425,516 کارت
دەنگدانی تایبەت (هێزە ئەمنییەکان): 44,787 کارت
ئاوارەکان: 758 کارت
بە گوتەی جومانە غەلای، دابەشکردنی ئەو کارتانە لە رێگەی بنکەکانی تۆمارکردنەوە دەبێت.
بەگوێرەی کۆمیسیۆنی هەڵبژاردنەکان، ژمارەی دەنگدەران و بنکە و وێستگەکانی دەنگدان بەم شێوەیە:
- کۆی گشتیی ژمارەی دەنگدەران: 21,404,291 دەنگدەر
- ژمارەی دەنگدەرانی دەنگدانی گشتی: 20,063,773 دەنگدەر
- ژمارەی دەنگدەرانی دەنگدانی تایبەت: 1,313,980 دەنگدەر
- ژمارەی دەنگدەرە ئاوارەکان: 26,538 دەنگدەر
- ژمارەی بنکەکانی دەنگدانی گشتی: 8,703 بنکە
- ژمارەی وێستگەکانی دەنگدانی گشتی: 39,285 وێستگە
- ژمارەی بنکەکانی دەنگدانی تایبەت: 809 بنکە
- ژمارەی وێستگەکانی دەنگدانی تایبەت: 4,501 وێستگە
- ژمارەی بنکەکانی دەنگدانی ئاوارەکان: 97 بنکە
- ژمارەی وێستگەکانی دەنگدانی ئاوارەکان: 321 وێستگە
بڕیارە هەڵبژاردنی پەرلەمانی عێراق لە 11-11-2025 بەڕێوەبچێت. پەرلەمانی عێراق لە 329 کورسی پێکدێ کە 320ـیان گشتین و 9 کورسیشیان کۆتان.
