رووداو دیجیتاڵ
سەرۆکوەزیرانی عێراق لە کۆبوونەوەی لەگەڵ سەرۆکی تائیفەی شیعەکانی سووریا رایدەگەیێنێت، لەگەڵ گەلی سووریایە بە هەموو پێکهاتەکانیەوە و پشتگیریی سەروەری و یەکپارچەیی خاکی سووریا دەکات.
شەوی رابردوو محەممەد شیاع سوودانی، سەرۆکوەزیرانی عێراق لەگەڵ سەید عەبدوڵڵا نیزام، سەرۆکی تائیفەی شیعەکانی سووریا کۆبووەوە.
بەگوێرەی راگەیێندراوی نووسینگەی سەرۆکوەزیرانی عێراق، لە دیدارەکەدا، "باسی پێشهاتەکانی دۆخی سووریا و رەوشی ئەو وڵاتە کرا، سەرۆکوەزیران دووپاتیکردەوە کە عێراق لەگەڵ گەلی سووریایە بە هەموو ئایین و پێکهاتەکانیەوە، پشتگیری سەروەری و یەکپارچەیی خاکی سووریا و تەواوی پێکهاتەکانی دەکات."
هەر لە دیدارەکەدا جەخت کرایەوە لەسەر گرنگی یەکخستنی ئەو گوتارەی کە پشتگیری لە پێکەوەژیان و ئاشتیی کۆمەڵایەتی دەکات، لە رێگەی رۆڵی پیاوانی ئایینی و بەهێزکردنی یەکگرتوویی کۆمەڵایەتی، رەتکردنەوەی تووندڕۆیی و بەهێزکردنی چەمکی هاووڵاتیبوون بۆ بەدیهێنانی دادپەروەری کۆمەڵایەتی، پتەوکردنی بەندەکانی یەکێتیی نیشتمانی لە نێوان خەڵکی سووریا، بە شێوەیەک کە ئاسایش و سەقامگیری لە ناوچەکەدا بەهێز بکات.
