رووداو دیجیتاڵ
هاوپەیمانیى نەسر دەستپێشخەرییەک دەخاتە بەردەم سەرۆکوەزیرانى عێراق لە بارەى سووریاوە بۆ ئەوەى هاوکاریی مرۆیی بنێرنە ئەو وڵاتە و بەغداش رۆڵى لە گۆڕانى دیموکراسی ئەو وڵاتە هەبێت.
رۆژی دووشەممە، 16ى کانوونى یەکەمى 2024، هاوپەیمانیى نەسر دەستپێشخەرییەکى رایگەیاند بۆ پاڵپشتى سووریا، کە لە دوولایەنى مرۆیی و سیاسى پێکدێت و خستوویەتییە بەردەم محەممەد شیاع سوودانى، سەرۆکوەزیرانی عێراق.
بەشى یەکەمى دەستپێشخەرییەکەى هاوپەیمانیى نەسر کە حەیدەر عەبادى سەرۆکایەتى دەکات، لایەنى مرۆییە، تێیدا پێشنیاز کراوە سووتەمەنى و دەرمان و خۆراک لە عێراقەوە بنێردرێت بۆ سووریا.
سەلام زوبەیدى، گوتەبێژى هاوپەیمانیى نەسر بە تۆڕى میدیایی رووداوى راگەیاند: ئامانج لەو دەستپێشخەرییە، هاوکاریکردنى گەلى سووریا و پتەوکردنى پەیوەندى نێوان هەردوو گەلى عێراق و سووریایە.
بەشى دووەمى دەستپێشخەرییەکە ناونراوە، "دەستپێخەریى سیاسیى رافیدەین" بۆ پاڵپشتیی گۆڕانى سیاسى و دیموکراسى مەدەنییانە لە سووریا، بە ئامانجى ئەوەى چوارچێوەیەکى سیاسی و ئابوورى دابنرێت کە گەرەنتى هاوکاریی گۆڕانى دیموکراسى بکات لەو وڵاتە.
پاڵپشتییەکە بەشێوەیەک بێت کە "یەکێتى و سەقامگیریی و سەروەریى سووریا بپارێزێت و جگە لە عێراق و سووریا وڵاتانى دراوسێى عێراق و میسر و ئیمارات بەشداربن لەو چوارچێوەیەدا."
سەلام زوبەیدى گوتى: "لەگەڵ ئەوەداین لە گۆڕان بەرەو دیموکراسی لە سووریا هیچ لایەنێک پەراوێز نەخرێت و سووریا بە هەمان ئەزموونى عێراق لە دواى 2003 تێپەڕ نەبێت کە بگاتە ئەوەى دەستوەردانى هەرێمى و نێودەوڵەتى لە بڕیارەکانیدا هەبێت".
خاڵێکى دیکەى دەستپێشخەرییەکە ئەوەیە عێراق رۆڵى هەبێت لە پرسی سووریا ئەگەرنا هەڵوێستى نەرێنى دەبێت و ئەو بۆشاییە لایەنى دیکە پڕى دەکەنەوە.
8ى کانوونى یەکەمى 2024، دەسەڵاتى بەشار ئەسەد لە سووریا رووخا و حکومەتێکى کاتى بۆ قۆناخى راگوزەر پێکهێنراوە.
سەلام زوبەیدى رایگەیاند، ئەو دەستپێشخەرییەیان لە کۆبوونەوەى هاوپەیمانیى چوارچێوەى هاوئاهەنگیی شیعە تاوتوێ کردووە و هەندێک لایەن هاوڕا و هەندێکى دیکەش بۆچوونى جیاوازیان هەبووە.
