رووداو دیجیتاڵ
سەرەڕای ئەوەی زیاتر لە مانگێکە لەلایەن سەرۆکوەزیرانی عێراقەوە کراوەتەوە، هێشتا فڕۆکەخانەی موسڵ گەشتە ئاسمانییەکانی دەستپێنەکردووە. نوێنەرێکی پارێزگاکە لە پەرلەمانی عێراق دەڵێت، "بەگەڕخستنەوەی فڕۆکەخانەکە سێ مانگی دیکەی پێویستە."
شێروان دووبەردانی، نوێنەری پارێزگای نەینەوا لە پەرلەمانی عێراق، ئەمڕۆ یەکشەممە، 17ـی ئابی 2025، بە تۆڕی میدیایی رووداوی راگەیاند: "هەرچەندە فڕۆکەخانەی موسڵ بە فەرمی کراوەتەوە، بەڵام هێشتا کاری تێدا دەکرێت و لانیکەم سێ مانگی دیکەی پێویستە تاوەکو بە تەواویی دەکەوێتە کار و گەشتەکان دەستپێدەکەن."
نوێنەرەکەی پارێزگای نەینەوا لە پەرلەمانی عێراق، ئاماژەی بەوەشکرد، پێش داعش فڕۆکەخانەکە تەنیا گەشتی ناوخۆیی تێدا دەکرا، تائێستاش مۆڵەتی فڕۆکەوانی نێودەوڵەتی نییە.
بڕیارە ئەم هەفتەیە لیژنەی باڵای بەگەڕخستنی فڕۆکەخانەی موسڵ یەکەم کۆبوونەوەی خۆی بکات، بۆ تاوتوێکردنی ئەو گرێبەستانەی لەلایەن پێنج کۆمپانیای نێوخۆیی و نێودەوڵەتییەوە پێشکێشکراون.
عەبدولقادر دەخیل، پارێزگاری نەینەوا، لەبارەی گرێبەستەکانەوە ئەمڕۆ رایگەیاند، لەلایەن کۆمپانیاکانی "بەریتانیا، ئیمارات، عومان، تورکیا و عێراق"ـەوە پێشکێشکراون. بە گوتەی پارێزگار، لیژنەکە هەموو بژاردەکان تاوتوێ دەکات "بۆ دیاریکردنی لێهاتووترین کۆمپانیا کە خاوەن ئەزموون بێت لە بەڕێوەبردنی فڕۆکەخانە نێودەوڵەتییەکان، بەگوێرەی ستانداردە تەکنیکییەکانی جیهانی."
لیژنەکە لە نوێنەرانی پارێزگای نەینەوا، دەسەڵاتی فڕۆکەوانیی مەدەنی و ئیدارەی فڕۆکەخانەکانی عێراق پێکدێت و بە هاوئاهەنگیی راستەوخۆی محەممەد شیاع سوودانی، سەرۆکوەزیرانی عێراق و رەزاق محێبس، وەزیری گواستنەوە، کارەکانی بەڕێوەدەبات.
رۆژی 16ی تەممووزی 2025، محەممەد شیاع سوودانی، سەرۆکوەزیرانی عێراق، بە فڕۆکەیەکی مەدەنی لە فڕۆکەخانەکە نیشتەوە و بە فەرمی کردییەوە.
لەسەردەمی داعش فڕۆکەخانی موسڵ وێرانبوو. پرۆژەی نۆژەنکردنەوەی فڕۆکەخانەکە رۆژی 10ی ئابی 2022 دەستیپێکرد، کاتێک مستەفا کازمی، سەرۆکوەزیرانی ئەو کاتەی عێراق، بەردی بناخەکەی دانا.
فڕۆکەخانەی موسڵ یەکێکە لە کۆنترین فڕۆکەخانەکانی عێراق؛ مێژووی دروستکردنی بۆ ساڵی 1920 دەگەڕێتەوە و رووبەرەکەی 1600 دۆنمە.
