رووداو دیجیتاڵ
گوتەبێژی وەزارەتی پلاندانانی عێراق، بە تۆڕی میدیایی رووداوی راگەیاند، هەفتەی داهاتوو ئەنجامی کۆتایی پرۆسەی سەرژمێری گشتیی دانیشتووان لە عێراق و داتا و زانیارییە پەیوەندیدارەکان لە کۆنفرانسێکدا بڵاودەکەنەوە.
ئەمڕۆ یەکشەممە 16ـی شوباتی 2025، عەبدولزەهرە هینداوی بە زیاد ئیسماعیل، پەیامنێری رووداوی لە بەغدا راگەیاند، وەزارەتی پلاندانان بە هاوئاهەنگی لەگەڵ دەستەی سەرژمێری هەرێمی کوردستان و سندووقی نەتەوە یەکگرتووەکان بۆ گەشەپێدان ئامادەکاریی دەکات بۆ بەڕێوەبردنی کۆنفرانسێکی گەورە لە کۆتایی ئەم مانگەدا.
هینداوی لە وەڵامی پرسیاری پەیامنێری رووداو رایگەیاند، بە دیاریکراوی رۆژی 25ـی شوباتی 2025 کۆنفرانسەکە دەکرێت. ئەنجامی بنەڕەتی و تێروتەسەلی سەرژمێرییەکە بۆ رای گشتیی رادەگەیێندرێت. تێیدا داتا و زانیاری زۆر ورد و گرنگ لەخۆ دەگرێت.
سەبارەت بە داتا و ژمارەی هاووڵاتییانی عێراقی لە وڵاتانی جیهاندا، گوتەبێژی وەزارەتی پلاندانانی عێراق نەیشاردەوە کە تاوەکو ئێستا پلانی کاریان ئامادە نەکردووە و رایگەیاند، ئاماری ئەو عێراقییانەی لە دەرەوە دەژین بەردەست نییە، بەهۆی ئەوەی لە پلانی کارمان نەبووە. رەنگە لە داهاتوو لە قۆناخی دووەمی کارەکانمان زیاد بکرێت.
هەر سەبارەت بەم بابەتە، هینداوی رایگەیاند، "پشت بە خوا، کار دەکەین بۆ ئەوەی سەرژمێرییەکی تایبەت بۆ دیاریکردنی ژمارەی عێراقییەکانی دەرەوەی وڵات بکرێت. لە ئەگەری ئەنجامدانیشیدا سوود لەو ئامرازانە وەردەگیرێن کە لە سەرژمێری گشتی لە عێراق کرا بە تابلێت و ئامێرەکانی دیکەشەوە. بە جێبەجێکردنیشی، ئامێرەکان بەسەر باڵیۆزخانە کۆنسووڵگەرییەکانمان لە دەرەوەی وڵات دابەش دەکرێن، بەمەش لە پرۆسەی سەرژمێرییەکەدا سوودی لێ وەردەگیرێت.
پڕۆسەی سەرژمێریی گشتیی دانیشتووانی عێراق لە رۆژانی 16-19ـی تشرینی دووەمی 2024 دەستیپێکرد. تێیدا زانیارییەکانی دانیشتووان تۆمارکران و رۆژانی 20-21 پشتڕاستکردنەوە بۆ زانیارییە تۆمارکراوەکان کرا.
بەگوێرەى ئەنجامەکە، ژمارەى دانیشتووان لە عێراق و هەرێمى کوردستان 45 ملیۆن و 407 هەزار و 895 کەسە، ئەو ژمارەیە بیانییەکان و پەنابەرانیش دەگرێتەوە.
بەراورد بە ساڵى 2009 کە ژمارەى دانیشتووان 31 ملیۆن و 664 هەزار بوو، رێژەى ساڵانەى گەشەى دانیشتووان گەیشتووەتە 3%.
بەگوێرەى ئەنجامى بەرایی سەرژمێری، لە عێراق و هەرێمی کوردستان 7 ملیۆن و 898 هەزار و 588 خێزان هەن، تێکڕای ژمارەى ئەندامانى خێزان 5.3 کەسە.
ژمارەى رەگەزى نێر لە عێراق و هەرێمی کوردستان 22 ملیۆن و 784 هەزار و 62 کەسە، کە دەکاتە 50.1%ـی کۆی ژمارەى دانیشتووان.
ژمارەى رەگەزى مێ 22 ملیۆن و 623 هەزار و 833 کەسە، کە دەکاتە 49.8%ـى کۆی ژمارەى دانیشتووان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ