رووداو دیجیتاڵ
لەگەڵ لووتکەی وڵاتانی عەرەبی لە بەغدا، دوو لووتکەی دیکە بەڕێوەدەچن. شارەکە رۆژی شەممەی داهاتوو زۆرترین جموجووڵی تێدا دەبێت.
لووتکەکانی شەممەی داهاتوو، 17ـی ئەم مانگە، لە بەغدا بریتین لە: لووتکەی وڵاتانی عەرەبی، لووتکەی گەشەپێدانی وڵاتانی عەرەبی و، لووتکەی سێقۆڵیی عێراق، ئوردن و میسر.
لووتکەی وڵاتانی عەرەبی سێ ناوی هەیە: لووتکەی بەغدا، لووتکەی عەرەبیی 2025، و لووتکەی 34ـی کۆمکاری عەرەبی.
هاوڕێ تۆفیق، نوێنەری سەرۆککۆمار لە لیژنەی کاروباری سیاسی و دیپلۆماسی تایبەت بە ئامادەکاریی لووتکەی کۆمکاری عەرەبی لەوبارەیەوە بە رۆژی هیوا جەمالی راگەیاند، د. لەتیف رەشید، سەرۆککۆماری عێراق کە سەرۆکی لووتکەکەیە، دوو گوتاری دەبێت: گوتاری بەخێرهاتن و کردنەوەی لووتکەکە تێیدا سیاسەتی گشتیی عێراق باس دەکات و، گوتاری کۆتایی لووتکەکە.
بەگوێرەی زانیارییەکان، هەر لەو لووتکەیەدا کە 22 وڵاتی عەرەبی تێیدا بەشدارن، محەممەد شیاع سوودانی، سەرۆکوەزیرانی عێراق گوتارێکی دەبێت. گوتارەکەی سەرۆکوەزیران لەبارەی وەبەرهێنان و گەشەپێدانەوە دەبێت لە عێراق.
هەمان رۆژ و لە پاشنیوەڕۆی شەممە، لووتکەی گەشەپێدانی وڵاتانی عەرەبی لە بەغدا ساز دەکرێت کە چوار ساڵ جارێک ئەنجام دەدرێت.
هاوکات، هەر هەمان رۆژ، لووتکەیەکی دیکە هەیە بە ناوی لووتکەی سێقۆڵی کە لەنێوان عێراق، ئوردن و میسردا ئەنجام دەدرێت.
جگە لە وڵاتانی عەرەبی، کۆمەڵێک شاند لە وڵاتانی دیکەی ناوچەکە و ئەورووپاوە بەشداریی لووتکەکانی رۆژی شەممەی بەغدا دەکەن.
