عێراق سەرکۆنەی هێرشەکانی ئەمریکا و بەریتانیا بۆ سەر حووسییەکان دەکات

 

رۆژی هەینی، 12-1-2024، وەزارەتی دەرەوەی عێراق راگەیێندراوێکی لەبارەی هێرشەکەی ئەمریکا و بەریتانیا بۆ سەر حووسییەکان لە یەمەن بڵاوکردەوە.   

 

وەکو لە راگەیێندراوەکەدا هاتووە، "لە سەرەتای هێرش و ئەو شەڕ و ستەمکارییانەی هێزەکانی داگیرکار بۆ سەر کەرتی غەززە دەیکات، عێراق هۆشداری لە لێکەوتەکانی بەردەوامیی پشتیوانیکردنی قەوارەی زەوتکار دا و نەگرتنە ئەستۆی بەرپرسیارێتی لەلایەن وڵاتانی زلهێزەوە دۆخەکە بەرەو پێشهاتی گشتگیر دەبات کە لە سنووری غەززە و خاکی فەلەستین ناوەستێت، ئەوەش وا دەکات مەترسیی شەڕ و بڵاوبوونەوەی تووندوتیژی لە دەوروبەری تەواوی ناوچەکە هەبێت." 

 

وەزارەتی دەرەوەی عێراق جەخت لەوە دەکاتەوە، بانگەوازەکان بۆ راگرتنی شەڕ پشتگوێخراون و لە هەمانکاتدا "رەفتاری دوژمنکارانەی داگیرکار کە چەندین وڵاتی رۆژئاوای لەپشتەوەیە لە رێگەی پشتیوانیکردنیان بۆ شەڕی قڕکردن لە دژی فەلەستینییەکان بەردەوام بوو."

 

عێراق سەرکۆنەی هێرشەکەی ئەمریکا و هاوپەیمانەکانی بۆ سەر حووسییەکانی یەمەن دەکات و دەڵێت: "لەگەڵ ئەوەی جەخت لە پاراستنی ئازادیی هاتووچۆ لە ئاوەکانی نێودەوڵەتی دەکەینەوە، سەرکۆنەی هێرشکردنە سەر یەمەن و سەروەرییەکەی دەکەینەوە، پێشمانوایە فراوانکردنی بازنەی کردنە ئامانجەکان چارەسەری کێشەکە ناکات، بەڵکو چوارچێوەی شەڕ فراوان دەکات. چارەسەر خۆی لەوەدا دەبینێتەوە ئەنجوومەنی ئاسایشی نێودەوڵەتی بەرپرسیارێتییەکانی بگرێتە ئەستۆ و بڕیارێک بۆ راگرتنی شەڕی دوژمنکارانە و وەحشییانەی دژ بە فەلەستینییەکان لە غەززە دەربکات." 

 

رۆژی هەینی 12ی کانوونی دووەمی 2024، ئەلێکس گرنگویچ، فەرماندەی هێزی ئاسمانیی ئەمریکا لە راگەیێندراوێکدا رایگەیاند: "بە فەرمانی فەرماندەی ناوەندیی هێزەکانی ئەمریکا و هێزە ئاسمانییەکان، هێرشکرایە سەر زیاتر 60 ئامانج لە 16 ناوچەی حووسییەکانی نزیک لە ئێران، لەوانە بنکەی کۆنترۆڵ و چاودێریکردن، کۆگەی تەقەمەنی، سیستمی ئاراستەکردنی مووشەک، کارگەی بەرهەمهێنانی چەک و سیستمی راداری ئاسمانی." 

 

عەمید یەحیا سەریع، گوتەبێژی فەرماندەیی گشتیی هێزە چەکدارەکانی حووسییەکان لە پەیامێکی ڤیدیۆییدا گوتی: "ئەمریکا و بەریتانیا 73 جار هێرشیان کردە سەر یەمەن و تێیدا سەنعای پایتەخت و پارێزگاکانی حودەیدە، تەعز حوجە و سەعدە کراونەتە ئامانج، بەهۆی ئەو هێرشانەوە پێنج کەس لە ئەندامانی هێزە چەکدارەکان شەهید بوون و شەش کەسی دیکەش بریندار بوون."