کەسوکارەکەی، وێنەی کوژراوەکەیان بەرز کردووەتەوە.
رووداو دیجیتاڵ
پارێزەر عەدنان نعێمی، شێخی هۆزی نعێمییەکان لەلایەن دوو گەنجەوە بە چەقۆ لەنێو نووسینگەکەیدا لە ناوچەی دۆڕەی بەغدا کوژرا و کەسوکارەکەی گلەیی زۆریان لە حکومەت هەیە.
کامێراکانی چاودێری کاتی هێرشکردنی دوو بکوژەکە و کوشتنی ناوبراویان تۆمارکردووە. کەسوکاری، رووداوەکە بە هێرشێکی پڕ لە ستەم دەناسێنن و گلەیی لە هێزە ئەمنییەکانی حکومەت دەکەن.
سەعەد نعێمی، مامی کوژراوەکە دەڵێت، "ئێمە هی خواین و هەر بۆ ئەو دەگەڕێینەوە، بەڵام ئەگەر دەوڵەت و حکومەت هەبووان، ئەم رووداوە رووینەدەدا. چۆن دەکرێت چەند چەتەیەک تا نووسینگەی خوالێخۆشبوو بچن و بیکوژن، بەبێ ئەوەی دەستگیر بکرێن؟ حکومەت چی کردووە؟ هیچی نەکردووە، بەڵام ستەم هەر ستەمە و ئازار دەچێژین، بۆچی کوژرا؟".
ئیبراهیم نعێمی، برای کوژراوەکە دەڵێت، "کاتێک بکوژەکان چوونە نێو نووسینگەکەی، هێزێکی پۆلیس لە نزیک شوێنی رووداوەکەدا بووە، 15 خولەک بە برینداری ماوەتەوە و کەس بەهانایەوە نەچووە، تا ئەو کاتەی کوڕەکەی گەیشتە هانای و بە ئۆتۆمبێلی خۆی گواستییەوە نەخۆشخانە، نەک بە ئەمبووڵانس. لە نەخۆشخانەی یەرمووک قوتابیانی کۆلێژی پزیشکی چارەسەریان کردووە نەک پزیشکەکان. حکومەت لە کوێیە؟ دەستمان بۆ خوای گەورە بەرز دەکەینەوە".
کەسوکارەکانی لە هۆزی نعێمی خەمبار و دڵگرانن و هاوڕێیەکانیشی دەڵێن، پێدەچێت تاوانبارەکان پێشتر بانگهێشتی نووسینگەکەیان کردبێت و دواتر کوشتوویانە.
سەعەد مەسعودی، هاوڕێی کوژراوەکە باس لەوە دەکات، "تاوانباران، ویستوویان لە نووسینگەکەی خۆیدا بیکوژن، پێشتر بە تەلەفۆن پەیوەندییان پێوەکردووە. بەدڵنیاییەوە لایەنە پەیوەندیدارەکان دەتوانن بە ئاسانی دەستگیری بکەن. کامێراکان وێنەی بکوژەکانیان گرتووە و بەدڵنیاییەوە ناسنامەکانیان ئاشکرا دەکرێن".
فەرماندەیی پۆلیسی بەغدا، دەستگیرکردنی تاوانبارانیان لە ماوەیەکی زۆر کەمدا راگەیاند. باسیان لەوەکرد کە بۆسەیان بۆ تاوانبارەکان داناوە و توانیویانە لە رێگەی چەند کەسێکی نزیکیانەوە قۆڵبەستیان بکەن. ئێستاش لێکۆڵینەوە لە هۆکاری کوشتنەکە دەکەن.
ئارامیی باڵی بەسەر دۆخەکەدا کێشا دوای بەخاکسپاردنی ناوبراو. کەسوکارەکەیشی چاویان لە ئەنجامی لێکۆڵینەوە و دادگەیە بۆ ئەوەی تووندترین سزایان بدەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ