رووداو دیجیتاڵ
محەممەد باقر قالیباف، سەرۆکی پەرلەمانی ئێران لە هەژماری فەرمیی خۆی لە تۆڕی کۆمەڵایەتیی (X)، داوای لە کۆمەڵگەی نێودەوڵەتی کرد سێ راپۆرتی تایبەتی رێکخراوی نەتەوە یەکگرتووەکان دەربارەی دۆخی فەڵەستین و "تاوانەکانی جەنگ" بخوێننەوە.
قالیباف ئەم راپۆرتانە وەک بەڵگەیەک بۆ "جینۆساید و هەڕەشە بۆ سەر شارستانییەتی مرۆیی" ناودەبات. سەرۆکی پەرلەمانی ئێران جەختی لەوە کردووەتەوە، "ئاگادارکردنەوەی جیهان بەشێکی گرنگە لە بەرگری" و ئەو تاوانانەی لە راپۆرتەکاندا هاتوون، بە گوتەی ئەو، "زیاترن لەوەی مرۆڤ بەرگەیان بگرێت."
لە پەیامەکەیدا ناونیشانی سێ راپۆرتە فەرمییەکەی نەتەوە یەکگرتووەکانی بڵاوکردووەتەوە، کە بریتین لە: راپۆرتی "ئەناتۆمیی جینۆساید"، راپۆرتی "لە ئابووریی داگیرکارییەوە بۆ ئابووریی جینۆساید" و راپۆرتی تایبەت بە "بەکارهێنانی سیستماتیکی تووندوتیژی لە دژی فەڵەستینییەکان."