رووداو دیجیتاڵ
دوای 11 رۆژ لە رادەستکردنی لیستی ناوی وەزیرە پێشنیازکراوەکان بە پەرلەمانی ئێران، کابینەکەی مەسعود پزیشکیان، سەرۆککۆماری نوێی ئێران ئەمڕۆ لەلایەن پەرلەمانەوە متمانەی پێدرا.
ئەمڕۆ چوارشەممە، 21ـی ئابی 2024، بە ئامادەبوونی مەسعود پزیشکیان، سەرۆککۆماری ئێران، پەرلەمانی ئەو وڵاتە بۆ تاوتوێکردنی شیاوێتیی دوو لە وەزیرانی پێشنیازکراو و هەروەها متمانەدان بە کابینەی پزیشکیان و کارنامەکەی کۆبووەوە.
لە کۆبوونەوەکەدا، لە بەردەوامی هەڵسانگاندنی وەزیرەکاندا، شیاوێتیی عەباس عەلی ئابادی، وەزیری پێشنیازکراوی وزە و ئەحمەد دونیامالی، وەزیری پێشنیازکراو بۆ وەزارەتی وەرزش و گەنجان تاوتوێکرا. هەردوو وەزیرەکە باسیان لە بەرنامەکانیان کرد و دواتر پەرلەمانتارانی دژبەر و لایەنگر دەرفەتی قسەکردنیان پێدرا.
مەسعود پزیشکیان لە کۆبوونەوەکەدا لە گۆتارێکدا بەرگری لە کابینەکەی و وەزیرە پێشنیازکراوەکان کرد و داوای لە پەرلەمانتاران کرد، دەنگی پێبدەن.
پزیشکیان لە گوتارەکەیدا رایگەیاند، کابینەکەی سیمبوڵی یەکگرتوویی و رێککەوتنە لەگەڵ هەموو لایەنەکان و جەختی لەوەکردەوە، وەزیرەکان بە راوێژ لەگەل عەلی خامنەیی، رێبەری کۆماری ئیسلامی ئێران دەستنیشان کراون.
دوای گوتاری پزیشکیان، دەنگدان بۆ پێدانی متمانە بە وەزیرانی پێشنیازکراو دەستیپێکرد و بە پێی ئەنجامەکان، هەموو کابینەکەی پزیشکیان متمانەی پێدرا کە لە 19 وەزیر پێکهاتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ