رووداو دیجیتاڵ
مووشەکی خوڕەمشەهر کە بەناوی شاری خوڕەمشەهرەوە ناونراوە، یەکێکە لە بەهێزترین مووشەکە بالیستییەکانی مەودا مامناوەندی ئێران.
ئەم مووشەکە کە بە سووتەمەنیی شل کار دەکات، بەهۆی توانای هەڵگرتنی کڵاوەیەکی جەنگیی زۆر قورسەوە، نیگەرانیی جیدیی لەسەر ئاستی نێودەوڵەتی دروستکردووە و بە یەکێک لە هەڕەشە ستراتیژییەکانی ئێران دادەنرێت.
پێکهاتە و بنەچە
بەپێی "ناوەندی توێژینەوەی ستراتیژی و نێودەوڵەتی"، ئەم مووشەکە وەشانێکی ئێرانیی مووشەکی "هواسۆنگ-10"ی کۆریای باکوورە. باس لەوە دەکرێت کە کۆریای باکوور وەشانێکی ئەم مووشەکەی بە ناوی BM-25 بە ئێران فرۆشتووە.
بەرپرسانی ئێران دەڵێن، ئەوان قەبارەی مووشەکەکەیان بچووکتر کردووەتەوە و "تاکتیکیتر"یان کردووە، ئەمەش رەنگە هۆکاری کەمبوونەوەی مەوداکەی بێت بەراورد بە وەشانی بنەڕەتی.
لەگەڵ ئەوەشدا، هەندێک لە شارەزایان، وەکو مایکڵ ئێلمانی لە پەیمانگەی IISS، پێیانوایە ئێران توانای ئەوەی هەیە مەودای مووشەکەکە زیاتر بکات، بەڵام بە ئەنقەست کڵاوەی قورستری لەسەر دادەنێت، بۆئەوەی لە کاتی تاقیکردنەوەدا مەوداکەی سنووردار دەربکەوێت و نیگەرانیی ئەورووپا کەم بکاتەوە.
بەهۆی کێشی زۆری کڵاوە جەنگییەکەیەوە، توانای ئەوەی هەیە کڵاوەی ئەتۆمی هەڵبگرێت، هەرچەندە روون نییە ئایا دەتوانێت چەندین کڵاوەی ئەتۆمی هەڵبگرێت یان نا.
تایبەتمەندییەکان
جۆر: مووشەکی بالیستیی مەودا مامناوەند (MRBM)
وڵاتی بەرهەمهێن: ئێران
کێش: 19.5 تۆن
درێژی: 13 مەتر
تیرە: 1.5 مەتر
سووتەمەنی: شل
مەودا: 2,000 کیلۆمەتر
کێشی کڵاوەی جەنگی: 1,800 کیلۆگرام
خێرایی: لەنێوان 8 بۆ 16 ماخ (واتە 8 بۆ 16 هێندەی خێرایی دەنگ)
شێوازی هەڵدان: سەکۆی گەڕۆک
جۆرە نوێیەکەی؛ خوڕەمشەهر-4 (خەیبەر)
لە 25ی ئایاری 2023، ئێران پەردەی لەسەر وەشانێکی نوێی ئەم مووشەکە بە ناوی خوڕەمشەهر-4 یان خەیبەر لادا. ئەم جۆرە نوێیە چەندین تایبەتمەندیی پێشکەوتووی هەیە:
مەودا: 2,000 کیلۆمەتر بە کڵاوەیەکی جەنگیی 1,500 کیلۆگرامییەوە.
بزووێنەری پێشکەوتوو: سووتەمەنییەکی پێشکەوتووی (hypergolic) تێدا بەکاردێت کە دەتوانرێت بۆ ماوەی چەندین ساڵ لە تانکییەکانیدا هەڵبگیرێت، ئەمەش کاتی ئامادەکاری بۆ هەڵدان بۆ 12 خولەک کەم دەکاتەوە.
سیستمی ئاراستەکردن: سیستمێکی ئاراستەکردنی هەیە کە رێگەی پێدەدات لە دەرەوەی بەرگەهەوای زەوی رێڕەوی خۆی راست بکاتەوە، ئەمەش وای لێدەکات بەرگری لە سیستمەکانی جەنگیی ئەلیکترۆنی بکات.
.jpg&w=3840&q=75)
