رووداو دیجیتاڵ
حووسییەکان دەڵێن، هێرشێکی ئاسمانی کراوەتە سەر سەنعای پایتەختی یەمەن و ئەنجامدانی هێرشەکە دەخەنە ئەستۆی ئەمریکا و بەریتانیا.
رۆژی هەینی 27-12-2024 حووسییەکانی یەمەن بڵاویانکردەوە، هێرشکرایە سەر سەنعا. حووسییەکان هێرشەکەیان بە "دووژمنکاریی بەریتانیا و ئەمریکا" ناوبرد.
چەند شایەتحاڵێکیش بە ئاژانسی فرانس پرێسیان گوت، ئەنجامی بۆردوومانەکانیان بینیوە. یەکێکیان گوتی: "ماڵەکەم لەگەڵ دەنگی تەقینەوەکە لەریەوە."
تاوەکو ئێستا هیچ لێدوانێک لە بەریتانیا و ئەمریکاوە لەبارەی ئەو هێرشە بڵاونەکراوەتەوە.
ئەم هێرشە لەکاتێکدایە، رۆژی پێنجشەممە 27-12-2024، ئیسرائیل فڕۆکەخانەی نێودەوڵەتیی سەنعا و چەند پێگەیەکی یەمەنی بۆردوومانکرد. حووسییەکان رایانگەیاند، لە هێرشەکان سێ کەس کوژران و 11ـی دیکەش بریندارن.
وەک وەڵامێک بۆ هێرشەکەی پێنجشەممە، ئەمڕۆ هەینی حووسییەکان رایانگەیاند، مووشەکێک و درۆنێکییان ئاراستەی فڕۆکەخانەی بن گۆریۆن لە تەلئەڤیڤ کردووە.
دوای ئەوەی جەنگی غەززە لە 07-10-2023، هەڵگیرسا، حووسییەکانی یەمەن هاوپەیمانیی خۆیان بۆ حەماس دەربڕی و دەستیان بە هێرشکردنە سەر کەشتییەکانی نزیک لە ئیسرائیل لە دەریای سوور و بە ئامانجگرتنی ئیسرائیل کرد.
بەگوێرەی پەیمانگەی نێودەوڵەتی بۆ توێژینەوەی ستراتیجی، لەو کاتەوە "حووسییەکان بەبەکارهێنانی درۆن و مووشەک، زیاتر لە 220 هێرشیان کردووەتە سەر ئیسرائیل و زۆربەی هێرشەکان لە رێگەی سیستمی بەرگرییەوە بەرپەرچدراونەتەوە. هەروەها، بزووتنەوە یەمەنییەکە زیاتر لە 300 هێرشی کردووەتە سەر کەشتییەکان لە دەریای سوور".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ