رووداو دیجیتاڵ
وەزیری بەرگریی ئیسرائیل رایگەیاند، لە "بەرگریکردن" لە دروزەکانی سووریا بەردەوام دەبن و یارمەتیی مرۆیی و پزیشکییان پێدەدەن.
یسرائیل کاتس، ئەمڕۆ شەممە، لە پۆستێکی تۆڕی کۆمەڵایەتیی ئێکسدا رایگەیاند، سەردانی مەوفەق تەریف، رێبەری رۆحیی دروزەکانی ئیسرائیلی کردووە.
کاتس نووسیویەتی، "پابەندین بە پاراستنی برایانی دروزمان لە ئیسرائیل و بەردەوام دەبین لە کارکردن لە پێناو پاراستنی برایانی دروزیان لە سووریا."
دەشڵێت، "چاوم بەو سەرباز و ئەفسەرە دروزییە یەدەگانە کەوت کە هێڵێکی گەرم بەڕێوەدەبەن بۆ کۆکردنەوەی زانیاری لە بارەی سوەیدا و دەوروبەری."
ئەمە لە کاتێکدایە کە نێوەڕاستی ئەم مانگە، دوای دروستبوونی شەڕ و پێکدادان لە نێوان دروزەکان و دەشتەکییەکان لە پارێزگەی سوەیدای باشووری سووریا، کە بەشێکی هێزە ئەمنییەکانی دیمەشقیش تێیدا لە دژی دروزەکان شەڕیان کرد، ئیسرائیل هێرشی ئاسمانی کردە سەر هێزە ئەمنییەکان و بارەگەی وەزارەتی بەرگریی سووریاشی لە دیمەشق بۆردوومان کرد. هێرشەکان گوشاریان لەسەر هێزە ئەمنییەکانی سووریا دروستکرد کە دواتر لە سوەیدا کشانەوە.
لە شەڕی نێوان دروزەکان و دەشتەکییەکان، زیاتر لە هەزار و 300 کەس لە هەردوو لا کوژران.
