رووداو دیجیتاڵ
باڵیۆزخانەی ئەمریکا لە ئۆرشەلیم/قودس رۆژی یەکشەممە، 15-06-2025 هۆشدارییەکی ئەمنی دەرکرد و رایگەیاند، باڵیۆزخانەکە دادەخرێت و ئێستا توانای یارمەتیدانی هاووڵاتیانی ئەمریکی نییە بۆ دەرچوون لە ئیسرائیل.
لە راگەیێنراوەکەدا، باڵیۆزخانەی ئەمریکا فەرمانی بە سەرجەم فەرمانبەرانی حکومەتی ئەمریکا و خێزانەکانیان کردووە، تاوەکو ئاگادارییەکی دیکە لە ماڵەکانیان و شوێنە پارێزراوەکاندا بمێننەوە.
بەهۆی دۆخی ئەمنی و پابەندبوون بە رێنوێنییەکانی فەرماندەیی بەرەی ناوخۆی ئیسرائیل، باڵیۆزخانەی ئەمریکا لە ئۆرشەلیم/قودس و بەشی کۆنسووڵخانەی لە تەلئەڤیڤ رۆژی دووشەممە، 16ی حوزەیران بە تەواوی دادەخرێن و هیچ خزمەتگوزارییەکی کۆنسووڵگەری و دەرکردنی پاسپۆرت، پێشکێش ناکرێت.
ئەمریکا: ناتوانین هاووڵاتییانمان بگوازینەوە
خاڵی هەرە جێگەی سەرنجی راگەیێنراوەکە ئەوەیە، باڵیۆزخانەکە بە راشکاوی دەڵێت: "باڵیۆزخانەی ئەمریکا ئێستا لەو دۆخەدا نییە کە بتوانێت هاووڵاتییانی ئەمریکی بگوازێتەوە یان راستەوخۆ یارمەتییان بدات بۆ دەرچوون لە ئیسرائیل."
داخرانی فڕۆکەخانە و تاکە رێگەی دەرچوون، هۆشدارییەکە ئاماژەی بەوەشکردووە کە فڕۆکەخانەی بنگۆریۆن داخراوە و هیچ گەشتێکی بازرگانی یان تایبەت لەوێوە ئەنجام نادرێت.
تاکە رێگەی دەرچوون دەروازە وشکانییەکانە لەگەڵ ئوردن، کە بڕیارە رۆژی دووشەممە بە کاتێکی دیاریکراو کراوە بن.
![سێ رۆژە شەڕ وەستاوە؛ سعودیە درۆنەکانی [گرووپە چەکدارەکانی] عێراق تێکدەشکێنێت](/_next/image?url=https%3A%2F%2Fimages.rudaw.net%2Fimages%2Fasset%2Fnews%2F20260727200030_AFP__20260727__C39X7AF__v1__HighRes__IranUsIsraelWar.jpg&w=3840&q=75)
