رووداو دیجیتاڵ
لە کاتێکدا ئێران و ئیسرائیل لە سێیەم رۆژی شەڕی راستەوخۆدان، ئیسرائیل جارێکی دیکە پشتی بە سیستمە بەرفراوانەکەی بەرگریی ئاسمانی بەستووە بۆ پاراستنی هاووڵاتییانی. ئەم سیستمە، کە یەکێکە لە گرنگترین ئامرازەکانی نێو جبەخانەی ئیسرائیل و لە دەیەی رابردوودا ژیانی هەزاران هاووڵاتیی پاراستووە، لە چەندین چینی جیاواز پێکدێت.
سیستمی بەرگریی ئاسمانیی ئیسرائیل فرەچینە و لە چەند بەشێکی سەرەکی پێکدێت، هەریەکەیان بۆ رووبەڕووبوونەوەی جۆرێکی دیاریکراوی هەڕەشە داڕێژراوە.
سیستمی بەرگریی ئیسرائیل چۆن کاردەکات؟
1. گومەزی ئاسنین: قەڵخانی دژی مووشەکی مەودا کورت
مەودا: 4 بۆ 70 کیلۆمەتر.
بەرزیی ئامانج: تاوەکو 10 کیلۆمەتر.
ئەرک: بەرپەرچدانەوەی مووشەکی رووبەر بە رووبەری مەودا کورت، هاوەن و درۆن.
ژمارە: 10 پاتری لە سەرانسەری ئیسرائیلدا بڵاوکراونەتەوە، هەر پاترییەک لە 3 بۆ 4 مووشەکهاوێژ پێکدێت.
توانا: دەتوانێت چاودێریی 1,100 ئامانج لە یەک کاتدا بکات.
رێژەی سەرکەوتن: ئیسرائیل بانگەشەی سەرکەوتنی زیاتر لە 90% دەکات.
تێچوو: هەر مووشەکێکی بەرپەرچدانەوە نزیکەی 40,000 بۆ 50,000 دۆلاری تێدەچێت.
پشتیوانیی ئەمریکا: تاوەکو ئێستا زیاتر لە 2.9 ملیار دۆلاری بۆ پڕۆگرامەکە تەرخانکردووە.
چۆنیەتیی کارکردن (4 قۆناخ):
دەستنیشانکردن: رادار مووشەکی هاتوو دەستنیشان دەکات.
پێشبینیکردن: ناوەندی کۆنترۆڵ شوێنی بەرکەوتنەکە هەژمار دەکات.
هەڵسەنگاندن: بڕیار دەدات ئایا مووشەکەکە هەڕەشەیە بۆ سەر ناوچەی نیشتەجێبوون یان نا.
بەرپەرچدانەوە: ئەگەر هەڕەشە بوو، مووشەکێک بۆ لەناوبردنی دەنێرێت.
2. قەڵخانی داود: بۆ هەڕەشەی مەودا مامناوەند
مەودا: تاوەکو 300 کیلۆمەتر.
بەرزیی ئامانج: تاوەکو 15 کیلۆمەتر.
ئەرک: بەرپەرچدانەوەی مووشەکی بالیستیی مەودا گەورە، مووشەکی بالیستی و مووشەکی کرووز.
پڕۆژە: هاوبەشیی نێوان کۆمپانیای رافائێلی ئیسرائیلی و رایسۆنی ئەمریکی.
توانا: دەتوانێت چاودێریی 1,100 ئامانج بکات.
3. سیستمی تیژڕۆ: بەرگری لە دەرەوەی بەرگەهەوا
ئەرک: بەرپەرچدانەوەی مووشەکی بالیستیی مەودا دوور، زۆربەی کات لە دەرەوەی بەرگەهەوا.
سیستمی تیژڕۆ2
مەودا: تاوەکو 100 کیلۆمەتر.
بەرزیی ئامانج: تاوەکو 50 کیلۆمەتر.
شێواز: بە بەکارهێنانی کڵاوەی پارچەپارچەبوو، مووشەکی هاتوو لە قۆناخی کۆتاییدا لەناودەبات.
تیژڕۆ 3
مەودا: تاوەکو 2,400 کیلۆمەتر.
بەرزیی ئامانج: تا 100 کیلۆمەتر.
شێواز: مووشەکی هاتوو لە بۆشایی ئاسماندا پێش ئەوەی بگەڕێتەوە نێو بەرگەهەوا، لەناودەبات.
پشتیوانیی زیادە: سیستمی THAADی ئەمریکی و فڕۆکەی F-35
سیستمی THAAD: سیستمێکی بەرگریی ئەمریکییە کە لە تشرینی یەکەمی رابردووەوە لە ئیسرائیل جێگیرکراوە و توانای بەرپەرچدانەوەی مووشەکی بالیستی هەیە لە مەودای 150 بۆ 200 کیلۆمەتر.
فڕۆکەی F-35I: ئیسرائیل فڕۆکەی جەنگیی پێشکەوتووی F-35ی هەیە کە پێشتر بۆ خستنەخوارەوەی درۆن و مووشەکی کرووز بەکاریهێناوە.
