رووداو دیجیتاڵ
باوکی سەڵاحەدین دەمیرتاش، سیاسەتڤانی کورد، لە ئامەدی باکووری کوردستان بەهۆی نەخۆشییەوە کۆچی دوایی کرد.
بەیانی ئەمڕۆ یەکشەممە، 31ـی کانوونی یەکەمی 2023، تاهیر دەمیرتاش، باوکی سەڵاحەدین دەمیرتاش، سیاسەتڤانی کورد، لە نەخۆشخانەیەکی ئامەد کۆچی دوایی کرد.
تاهیر دەمیرتاش، نزیکەی ساڵێک بوو بەدەست نەخۆشی دڵەوە دەیناڵاند. لەم ماوەیەدا دووجار تووشی جەڵتەی دڵ بووە و تەندروستیی ناجێگیر بوو.
سەڵاحەدین دەمیرتاش، دوای وەرگرتنی رەزامەندی وەزارەت دادی تورکیا، رۆژی 6ـی ئایاری 2023، لە گرتووخانەی سزا قورسەکانی پارێزگای ئەدیرنەوە بە فڕۆکەیەکی تایبەت چووە ئامەد و لە نەخۆشخانە سەردانی تاهیر دەمیرتاشی باوکی کرد بۆ دڵنیابوونەوە لە تەندروستی.
باوکی سەڵاحەدین دەمیرتاش چەند رۆژێک بوو لە بەشی چاودێری چڕی یەکێک لە نەخۆشخانەکانی ئامەد چارەسەری وەرگرت، بەهۆی تێکچوونی دۆخی تەندروستییەوە، بەیانی ئەمڕۆ کۆچی دوایی کرد.
تاوەکو ئێستا بنەماڵەی دەمیرتاش هیچ زانیارییەکیان لەبارەی کات و شوێنی بەخاکسپاردنی تاهیر دەمیرتاش بڵاونەکردووەتەوە.
