رووداو دیجیتاڵ
لەئەنجامی شەڕی نێوان دوو گەنج لە کەلار، یەکێکیان کە گەنجێکی تەمەن 18 ساڵ بوو، بە چەقۆ کوژرا.
عەلی جەمال قدووری، گوتەبێژی پۆلیسی گەرمیان ئەمڕۆ (دووشەممە، 31-3-2025) لە راگەیێندراوێکدا گوتی "لە ئەنجامی شەڕەکەدا یەکێک لە گەنجەکان بە چەقۆ هێرشی کردووەتە سەر ئەوی دیکە و دوای گەیاندنی بە نەخۆشخانە، گیانی لەدەستدا."
گەنجەکەی کوژراوە ناوی ئالان ئاسۆ حەمەڕەشیدە، لەدایکبووی ساڵی 2007 و، دانیشتووی گەڕەکی ئازادیی قەزای کەلار بووە.
هونەر حەمید، پەیامنێری رووداو لە کەلار دەڵێ "رووداوەکە بەرەبەیانیی ئەمڕۆ روویداوە."
گوتەبێژەکە لە راگەیێندراوەکەیدا هەروەها گوتی "دوای رووداوەکە، پۆلیسی بەشی نەهێشتنی تاوانی گەرمیان چوونە شوێنی رووداوەکە و توانیان تۆمەتبار بەناوی (ئ. ئ. ح.) کە لەدایکبووی 2006، دەستگیربکەن.
تۆمەتبار بە گوتەی عەلی جەمال قدووری "دانی بە تاوانەکەدا ناوە و ئێستا بە بڕیاری دادوەری لێکۆڵینەوەی کەلار، بەپێی مادەی 406 لەیاسای سزادانی عیراقی راگیراوە. لێکۆڵینەوەش لە رووداوەکە بەردەوامە."
