جیاوازتر لە ساڵانی رابردوو، ئەمڕۆ یادی شەهید ئارام لە سلێمانی دەکرێتەوە

رێوڕەسمەکە لە کاژێر 15:00 لە هۆڵی شەهید ئازاد هەورامی بەڕێوەدەچێت و تێیدا هاوڕێکانی "کە هەرکامەیان شارەزای بەشێکی ژیانی شەهید ئارامن"، زانیاریی نەزانراوی مێژووی ئەو شەهیدە باس دەکەن.

لەو یادەدا، چەند بابەتێک لەبارەی قۆناخەکانی ژیان و خەباتی سیاسی و شۆڕشگێڕانەی شەهید ئارام و زانیاری نەزانراو لەسەر مێژووی ئەو شەهیدە باس دەکرێت.

شەهید ئارام لە مانگی 11ی ساڵی 1947، لە گەڕەكی (حاجی حان)ی شاری سلێمانی لەدایك بووە. خوێندنی سەرەتایی لە شارۆچکەی ماوەت و چوارتا تەواوکردووە و قۆناخی ئامادەیی لە سلێمانی تەواوکردووە.

لە ساڵی 1964 لەبەشی میكانیكی كۆلێژی ئەندازیاری زانكۆی بەغدا وەرگیراوە، بەڵام بەهۆی كەمی توانای بینایی چاوەكانی، وەرگرتنەكەی رەتكراوەتەوە و بە ناچاری چووەتە كۆلێژی بازرگانی‌ و لەساڵی 1969 – 1970، ئەو کۆلێژەی تەواو كردووە.

هەر لە سەرەتای لاویێتییەوە، تێکەڵاوی کاری سیاسیی و دنیای رۆشنبیریی بووە و ئەندامی چالاکی یەکێتیی قوتابییان بووە، هاوکات رۆژنامەنووسێکی چالاکیش بووە و لە ساڵانی حەفتاکانی سەدەی رابردوودا، چەندین بابەتی لە رۆژنامەکانی ھاوکاریی و برایەتیی دا بڵاوکردووەتەوە.

لەکۆنگرەی سەرتاسەری قوتابیانی عێراقدا لەساڵی 1969 و لەناو ھۆڵی کۆنگرەدا رووبەڕووی ئەندامانی یەکێتیی نیشتمانیی قوتابیانی عێراق وەستاوەتەوە کە سەر بە رژێمی ئەوکاتەی عێراق بوون و لەگەڵ ھاوڕێکانیدا (نوێنەرایەتی قوتابیانی کوردستان) کشانەوە و ھۆڵی کۆنگرەیان بەجێھێشت.

لە ساڵی 1970 شەهید ئارام چووەتە ریزی ئەڵقە رۆشنبیرییەکانی کۆمەڵەی مارکسی-لینینی کوردستانەوە، هەر لەو ساڵەدا یەکێک بووە لە ئەندامانی دەستەی دامەزرێنەری کۆمەڵەی رەنجدەرانی کوردستان، ساڵی 1974 وەک نوێنەری سکرتاریەتی یەکێتیی قوتابیانی کوردستان بەشداریی کۆنگرەی لاوانی جیھانی لە مۆسکۆ کردووە، ساڵی 1976 دوای دەستگیرکردنی خاڵە شەھاب و ھاوڕێکانی، شەهید ئارام وەکو سکرتێری کۆمەڵە ئەرکی راپەڕاندنی ئیشوکارەکانی کۆمەڵەی لە ئەستۆ گرتووە.

ساڵی 1975 کە یەکێتیی نیشتمانیی کوردستان دادەمەزرێت، شەهید ئارام رۆڵێکی گەورەی تێدا دەگێڕێت، تا لە ساڵی 1977 دەبێتە ئەندامی مەکتەبی سیاسیی یەکێتیی.

کاتێک لەساڵی 1976 بڕیاری ھەڵگیرساندنەوەی شۆڕشی نوێ درا، لەبەر هەلومەرجی ئەوکاتە، ناچێتە شاخ و بەنھێنی لەشاردا دەمێنێتەوە بەمەبەستی بەھێزکردنی رێکخستنەکان. لە مانگی 10ی ساڵی 1976 شەهید ئارام دەچێتە شاخ و درێژە بە خەباتی دەدات. 

یەکەم بەیاننامەی دامەزراندنی کۆمەڵەی خوێندکارانی کوردستانی نووسیوە و یەکەم نامیلکەی یەکێتیی وەرگێڕاوەتە سەر زمانی کوردی. بەنهێنیش چاپخانەیەكی سەرەتایی لەناوچەی قەرەداخ دادەنێت، بەیاننامە و بڵاوكراوەكانی شۆڕشی دەنووسی و چاپی دەكردن.

شەهید ئارام فیکرێکی چەپی هەبووە، لە ساڵی 1975  لە ژمارە 1ی ئاڵای شۆڕشدا نووسیویەتی:"شۆڕشەكەمان بریتیی نییە لە بزووتنەوەیەكی نەتەوەیی تەسكی گەلی كورد، بەڵكو شۆڕشی دیموكراتی گەلانی عێراقە و لە كوردستانەوە بەهۆی تەقینەوەی ناكۆكییەكانەوە و هەروەها لە سایەی باش هەڵكەوتنی كوردستانەوە دەستیپێكردووە".

لە رۆژی 31ی مانگی 1ی 1978، شەهید ئارام لە گوندی تەنگیسەری ناوچەی قەرەداخ كەوتە بۆسەی رژێمی بەعسی عێراق و شەهیدكرا. مەفرەزەیەک بە سەرپەرشتی عاسی رەئووف دەچنە گوندی تەنگیسەر، ئەم مەفرەزەیە لە قیادەی قوات جەحافل (کە بارەگای لە چەمچەماڵ بوو) دەرچووبوون. بەهۆی ئەوەی کە نەیانزانیبوو ئەوەی کەوتووەتە بۆسەکەیان کێیە، تەرمەکەشیان لە شوێنی رووداوەکەدا بەجێھێشتبوو، دواتر لەڕێگەی ئێزگەی یەکێتی و دەزگای سیخوڕییەوە زانیبوویان ئەوەی کە شەھیدیان کردووە شەهید ئارامی سەرکردەی دیاری کۆمەڵەی رەنجدەران و یەکێتی نیشتمانی کوردستان بووە.