رووداو دیجیتاڵ
لە پارێزگای هەڵەبجە تەنیا یەک بەربژێری سەربەخۆ بۆ هەڵبژاردنی پەرلەمانی کوردستان هەیە. ئەو بەربژێرە بە رووداوی راگەیاند بڕوای هەیە، کە لە هەڵبژاردنەکان دەنگی پێویست بهێنێت و دەربچێت، سەرەڕای ئەوەی "کارێکی زەحمەت" دەبێت.
لە بازنەی هەڵبژاردنی پارێزگەی هەڵەبجە، کە لایەنەکانی بەشداری و کێبڕکێ لەسەر سێ کورسی پەرلەمان دەکەن، تەنیا یەک بەربژێری سەربەخۆ هەیە و ئەو بەربژێرەش بە رووداوی راگەیاند: "خەڵک لە ترسی ئەوەی بەرامبەر بە لیستە گەورەکان دەرناچن، بۆیە وەکو سەربەخۆ خۆیان بەربژێر ناکەن."
رۆژی دووشەممە، 30ی ئەیلوولی 2024، سامان نامیق، کاندیدی سەربەخۆ لە بازنەی پارێزگای هەڵەبجە و تاکە بەربژێری سەربەخۆ لەو پارێزگەیە، لە لێدوانێکدا بۆ تۆڕی میدیایی رووداو لەبارەی نەبوونی بەربژێری سەربەخۆی دیکە لە بازنەکەدا رایگەیاند "هەڵەبجە سێ کورسییە و کێبڕکێیەکی بەهێز لەنێو ئەو 12 لیستە هەیە، کە لە پارێزگەی هەڵەبجە بەشداری لە هەڵبژاردن دەکەن."
هەروەها سامان لەدرێژەی قسەکانیدا بۆ رووداو گوتی: "کەس ناوێری لەترسی دەرنەچوون خۆی بە سەربەخۆ لە هەڵەبجە بەربژێر بکات و لەگەڵ ئەوەش خەڵکی بێلایەن لێرە کەمە و زۆر سەختە بۆ کەسێکی سەربەخۆ کێبڕکێی لیست و پارتە گەورەکان بکات."
بازنەی هەڵەبجە بۆ هەڵبژاردنەکانی 20ی تشرینی یەکەمی پەرلەمانی کوردستان، 54 بەربژێر هەیە، کە 13یان ژنن و تەنیا یەک بەربژێری سەربەخۆش هەیە.
بەڵام لەگەڵ ئەوەش سامان نامیق، دەڵێ: "بڕوام بە خۆمە دەنگێکی باش بهێنم و باوەڕم هەیە سەرکەوتووبم."
ئەو بەربژێرە سەربەخۆیە گوتیشی: "چاڵنچی هەموو بەربژێرەکانم کردووە، کە مووچە و ئیمتیازاتی پەرلەمان رەتبکەنەوە و هەر لەئێستاوە رامگەیاندووە ئەگەر دەرچووم من هەموو ئیمتیازاتێک و مووچەی پەرلەمانتاری رەتدەکەمەوە."
سامان لەساڵی 1973 لە خورماڵ لەدایکبووەو هەر لەوێ نیشتەجێیە و پەرستارە و ماوەیەکیش بەڕێوەبەری نەخۆشخانەی تەوێڵە بووە و چالاکڤانێکی ناسراوی ناوچەکەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ