وەزیرێکی حکومەت: هیچ مووچەیەک نافەوتێت

ئایدن مەعرووف، وەزیری هەرێم بۆ کاروباری پێکهاتەکان، ئەمڕۆ یەکشەممە لە بووڵتەنی کاژێر 12:00ـی تۆڕی میدیایی رووداودا کە سەنگەر عەبدولڕەحمان پێشکێشی دەکات، جەختی لە گرنگی پرسی مووچە و رێککەوتنی نوێی نێوان هەولێر و بەغدا کردەوە و بە دەستکەوتێکی باش ناویبرد. ئایدن مەعرووف رایگەیاند: "پرسی مووچە کێشە بووە بۆ مووچەخۆرانی هەرێمی کوردستان"، بەڵام ئیدی "دڵنیایی دراوە کە مووچە مافێکی سەرەتاییە و نابێت بکرێتە کارتێکی سیاسی".

وەزیری پێکهاتەکان ئاماژەی بەوەدا، رێککەوتنی نوێی نەوتی هەرێمی کوردستان و عێراق کاریگەری ئەرێنی لەسەر چارەسەرکردنی پرسی مووچە دەبێت و گوتی: "ئەمە دەستکەوتێکی باشە بۆ عێراق بەگشتی و بۆ هەرێمی کوردستان بەتایبەتی. رۆڵی سەرۆک نێچیرڤان بارزانی و سەرۆکی حکومەت مەسرور بارزانی لەم پرۆسەیەدا زۆر گرنگ و کاریگەر بووە لە چارەسەرکردنی کێشەکان."

سەبارەت بە مووچەخۆران، ئایدن مەعرووف دڵنیایی دا کە هیچ مووچەیەک نافەوتێ و تەواوی مووچەکانی ئەمساڵ دەردێن و رایگەیاند: "لە ماوەی رابردوودا خەڵکی هەرێمی کوردستان، بەتایبەت مووچەخۆران، زۆر ناڕەحەتیان بینی لەبارەی مووچەوە. ئێستا حکومەتی عێراق پابەندە بە ناردنی مووچە و لەم هەفتەیەشدا دەست بە دابەشکردنی مووچەی مانگی حەوت دەکرێ."

لە بەشێکی دیکەی قسەکانیدا، وەزیری هەرێم بۆ کاروباری پێکهاتەکان داوای کاراکردنەوەی پەرلەمانی کوردستانی کرد و بە گرنگی دەزانێ پێش هەڵبژاردنی پەرلەمانی عێراق ئەم کارە ئەنجام بدرێ و گوتی: "وەک نەتەوەی تورکمان و پێکهاتەکانی دیکە، ئێمە لایەنگری سەقامگیری سیاسیین. پێکەوەژیان لە هەرێمی کوردستان لە ئاستێکی باشدایە."

ئایدن مەعرووف داوای کرد کە لە کابینەی داهاتووی حکومەتی هەرێمی کوردستان، پێکهاتەکان بە شێوەیەکی فراوانتر بەشدار بن و رایگەیاند: "تورکمان هەمیشە فاکتەرێکی ئەرێنی بووە بۆ پێکەوەژیان و سەقامگیری و هیچ کاتێک مەترسی نەبووە لەسەر عێراق و هەرێمی کوردستان."

لە ئاداری ساڵى 2023ەوە و لە ئەنجامی بڕیارێکی دادگەی نێوبژیوانی پاریس، هەناردەى نەوتى هەرێمى کوردستان لە رێگەى بەندەرى جەیهانى تورکیاوە راگیرا کە ئەوکات لەگەڵ نەوتى کەرکووکدا بڕەکەى رۆژانە دەگەیشتە نزیکەى 400 هەزار بەرمیل. 

دوای رێککەوتنی هەولێر و بەغدا لەسەر شێوازی هەناردەکردنەوە و رێککەوتنی سێقۆڵیش لەگەڵ کۆمپانیاکان، رۆژی شەممە 27/9/2025 هەناردەی نەوت دەستیپێکردەوە.