رووداو دیجیتاڵ
بەڕێوەبەرایەتیی پۆلیسی پارێزگای هەولێر رایگەیاند، لە قەزای بنەسڵاوە پیاوێک هاوژینەکەی خۆی کوشت.
ئەمڕۆ (پێنجشەممە، 27ـی شوباتی 2025) بەڕێوەبەرایەتیی پۆلیسی هەولێر لە راگەیێندراوێکدا بڵاویکردەوە، دوای ئەوەی ئەمڕۆ لە رووداوێکی کوشتن لە قەزای بنەسڵاوە ئاگادارکرانەوە، دەستبەجێ هێزەکانیان گەیشتنە شوێنی رووداوەکە.
بەڕێوەبەرایەتیی پۆلیسی هەولێر رایگەیاند "دوای لێکۆڵینەوە، بۆمان دەرکەوت پیاوێک لەسەر کێشەیەکی کۆمەڵایەتی هاوژینەکەی خۆی کوشتووە."
تۆمەتبار دوای تاوانەکە خۆی رادەستی پۆلیسی هەولێر کردووە.
پۆلیس پەڕاوی لێکۆڵینەوە بۆ رووداوەکە کردووەتەوە و رایگەیاندووە "تۆمەتبار بە بڕیاری دادوەر راگیراوە."
