رووداو دیجیتاڵ
بافڵ جەلال تاڵەبانی، سەرۆکی یەکێتیی نیشتمانیی کوردستان، لە ڤیدیۆیەکدا لەگەڵ دوو یوتیووبەری ئەمریکی، وردەکاریی گۆڕینی ئارەزووە وەرزشییەکانی ئاشکرا دەکات و ئاماژەش بە ئەگەری وەرگرتنی پۆستێکی باڵای عێراق دەدات.
لە بەشێکی ڤیدیۆکەدا یەکێک لە یوتیووبەرەکان باس لەوە دەکات کە چۆن هاوڕێیەکی پەیوەندی پێوە کردووە و پێی گوتووە "سەرۆکی وڵاتێک" دەیەوێ قسەت لەگەڵ بکات، بەڵام بافڵ تاڵەبانی یەکسەر قسەکەی دەبرێ و دەڵێ: "سەرۆکی پارتێک،" دواتر هەر خۆی دەڵێ: "لەوانەیە بەمزووانە."
سەبارەت بەوەی بۆچی بەم دواییە زیاتر لە کاتی راهێنانی تەقەکردن دا دەردەکەوێ، بافڵ تاڵەبانی ئاماژەی بەوە کرد کە ئەم گۆڕانکارییە لە ژیانی وەرزشییدا بۆ ساڵ و نیوێک لەمەوبەر دەگەڕێتەوە.
سەرۆکی یەکێتی دەڵێ: "نزیکەی ساڵ و نیوێک لەمەوبەر بۆم دەرکەوت کە چیدیکە ناتوانم وەک پێشتر قورسایی بەرزبکەمەوە یان زۆرانبازی بکەم و رابکەم، بۆیە بەدوای وەرزشێکی دیکەدا گەڕام." بافڵ تاڵەبانی رایگەیاند، ئیدی سەرنجی خستوەتە سەر راهێنانی تەقەکردن و لەو رێگەیەوە راهێنەری نوێی وەک (بێن)ـی ناسیوە.
لە بەشێکی دیکەی قسەکانی دا، بافڵ تاڵەبانی دەڵێ، ماوەیەکی درێژە بینەر و فۆڵۆوەری کەناڵەکەی ئەو دوو یوتیوبەرەیە، کە تایبەتە بە راهێنانەکانی تەقەکردن.
سەرۆکی یەکێتی ئاماژە بەوەش دەکات، هاوڕێیەک پێشنیازی ئەوەی بۆ کردووە کە بۆ هەندێک پرسیار و زانیاریی ورد، دەکرێ پەیوەندییان پێوە بکات و ئەوانیش یارمەتی بدەن؛ هەر ئەوەش بووەتە سەرەتای ناسینیان.
جەیک دۆیەر و کریس بلاو دوو یوتیووبەری ئەمریکین و لە کەناڵەکەی خۆیان (1911 Syndicate) ڤڵۆگێکی درێژیان لەگەڵ بافڵ تاڵەبانی کردووە و تێیدا دەچنە بازاڕی چەکفرۆشانی سلێمانی و بەغدا، چەند چەکێک تاقیدەکەنەوە، تەنانەت بە ئار پی جی پیکەپێک دەتەقێننەوە.
.jpg&w=3840&q=75)
