عومرەکارێکی کورد لە سعودیە کۆچی دواییکرد

رۆژی دووشەممە 24ـی شوباتی 2025، نەبەز ئیسماعیل، بەڕێوەبەری ئەوقافی هەولێر بە تۆڕی میدیایی رووداوی راگەیاند، "ئەو عومرەکارە شەش رۆژ لە مەککە و چوار رۆژ لە مەدینە بووە، عومرەی کردووە لە رێگەی گەڕانەوە بۆ هەرێمی کوردستان ئەمڕۆ لە دەرەوەی مەدینە لە نوێژی بەیانی گیانی لەدەستدا."

عومرەکارەکە ناوی هەینی شێخ محەممەد باپیرە، لە دایکبووی ساڵی 1967ـە و خەڵکی هەولێرە.

نەبەز ئیسماعیل گوتی: "عومرەکارەکە بە نەخۆشی گیانی لەدەستداوە."

زۆربەی ئەوانەی لە کاتی عومرە و حەج دەمرن، هەر لە گۆرستانەکانی سعودیە دەنێژرێن، بەڵام. بەڕێوەبەری ئەوقافی هەولێر گوتی، "بە ئەگەرێکی زۆرەوە تەرمی عومرەکارەکە دەهێندرێتەوە و لە هەرێمی کوردستان بە خاکدەسپێردرێت."

لە سەرەتای ئەم ساڵەوە شەش عومرەکاری کورد لە سعودیە کۆچی دواییان کردووە.