هەڵەیەک روویدا! دووبارە هەوڵبدە
زێڕنگرییەک لە بازاڕی قەیسەریی هەولێر.
رووداو دیجیتاڵ
بازاڕی زێڕنگران لە قەیسەریی هەولێر رۆژانێک جمەی دەهات و ئێستاش تاک و تەرا رێبوارێک پێیدا تێدەپەڕێ.
سەردار و بنەماڵەکەی زیاتر لە 30 ساڵە لەو بازاڕە دووکانیان هەیە، دەڵێ نەک کڕین کەمی کردووە ئێستا خەڵک ئامادە نییە زێڕەکەشی بفرۆشێ.
کاروان سەردار، زێڕنگرە و دەڵێت: "ساڵی رابردوو ئەگەر لە مانگێدا 30 بووکم هەبوایە، ئێستا مانگانە 5 بۆ 10 بووک دەبێت، رێژەکە زۆر کەمیکردووە، ئەو خەڵکەی زێڕیشی هەیە زۆر بەکەمی دەیفرۆشێت، مەگەر شتێکی کڕیبێت یان پێویستی بێت، چونکە خەڵک گەیشتووەتە ئەو بڕوایەی دەڵێن گرانتر دەبێت."
بەپێچەوانەی کەمبوونی کڕین و فرۆشتنی زێڕ بە مسقاڵ و گرام، ئێستا بازرگانان و پارەداران روویان لە کڕینی زێڕ بە تۆن و قالب کردووە.
هاوسەر هاواری بازرگانە و دەڵێت: "بەشێوەێکی گشتی بازاڕ تێکچوونێکی بەسەر هاتووە و جاران خەڵک زیاتر رووی کردبووە بازرگانیی خانووبەرە، بەڵام بەهۆی ناجێگیری و دابەزین لە نرخ و بەرزبوونەوەی نرخی زێڕ بۆیە بازرگانان روویان لە کڕینی زێڕ کردووە، لە جیاتی دانانی پارە لە ماڵەوە زێڕ دادەنێن، چونکە پێشبینی وایە زێڕ لەماوەیەکی کورتدا زیاتر نرخی بەرزبێتەوە."
ئەحمەد عەبدولکەریم، زێڕنگرە و دەڵێت: "بەشێوەێکی گشتی سەیربکەین بەڵێ، بازاڕ کزیی پێوەدیارە، چونکە هەر مسقاڵێک زێڕ [ـی عەیار 21] بە 530 هەزار دینارە، ئەمەش زۆرە بۆ کەسێک بیەوێ هاوسەرگیری بکات یانیش پێشتر ئەگەر 30 مسقاڵی کردبێت ئێستا دەیکاتە 20 ئەگەر 50ـی کردبێت ئێستا دەیکاتە 40. وەک پێشتر نییە و کەمبووەتەوە، بەڵام خەڵک ئێستا بەقاڵب دەیکڕێت ئەوەی پارەی هەیە لە ماڵەوە دەڵێت، دەیکڕم و ماوەیەکی دیکە گرانتر دەبێت. راستیشە مانگانە نرخی بەرز دەبێتەوە."
لە هەرێمی کوردستان زیاتر لە هەزار و 700 دووکانی زێڕنگری و 46 كۆمپانیای تایبەت بە بازرگانیی زێڕ هەن و رۆژانە لەنێوان 500 بۆ 600 تۆن زێڕ هاوردەی هەرێمی کوردستان دەکرێت و زیاتر لە 300 تۆنی هەناردەی تورکیا و ئێران دەکرێت. ئەوەش وایکردووە هەرێمی کوردستان ببێتە ناوەندێکی کۆفرۆشی زێڕ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ