رووداو دیجیتاڵ
نێچیرڤان بارزانی، سەرۆکی هەرێمی کوردستان دەڵێت، سەردانەکەی سەرۆککۆماری تورکیا بۆ عێراق و هەرێمی کوردستان، ئاماژەیە بۆ پەیوەندیی بەهێزی نێوان هەرێمی کوردستان و عێراق لەگەڵ تورکیا.
رەجەب تەیب ئەردۆغان، سەرۆککۆماری تورکیا، نیوەڕۆی ئەمڕۆ (دووشەممە، 22-4-2024) گەیشتە پایتەختی عێراق و لە فڕۆکەخانەی نێودەوڵەتیی شارەکە لە لایەن محەممەد شياع سوودانی، سەرۆکوەزیرانی وڵاتەوە بە گوتنەوەی سروودی نیشتمانیی عێراق و تورکیا و نمایشی پاسەوانی شەرەف، پێشوازیی لێ کرا.
بڕیارە کاژێر 19:30 رەجەب تەیب ئەردۆغان لە رێگەی فڕۆکەخانەی نێودەوڵەتیی هەولێرەوە بگاتە هەرێمی کوردستان و لە ئاستێكی باڵادا پێشوازی لێ دەکرێت.
سەرۆککۆماری تورکیا لە کاژێر 19:40 لەگەڵ نێچیرڤان بارزانی، سەرۆکی هەرێمی کوردستان و مەسرور بارزانی، سەرۆکوەزیران لە سەرۆکایەتیی هەرێمی کوردستان کۆدەبێتەوە.
سەرۆکی هەرێمی کوردستان لە پۆستێکی تۆڕی کۆمەڵایەتیی ئێکسدا دەڵێت: "سەردانە مێژووییەکەی سەرۆک ئەردۆغان بۆ بەغدا و هەولێر لە کاتێکی هەستیاری ناوچەکەدا دێت."
نێچیرڤان بارزانی باس لەوە دەکات "سەردانەکە ئاماژەیە بۆ پەیوەندییە بەهێزە سیاسی، ئابووری و ئەمنییەکانی عێراق و هەرێمی کوردستان لەگەڵ تورکیا."
هەروەها دەڵێ "چاوم لەوەیە لە هەولێر پێشوازی لە سەرۆک ئەردۆغان بکەم بۆ ئەوەی پرسە گەرمەکان، لە نێویاندا، ئاشتی، سەقامگیری و گەشەی ئابووری تاوتوێ بکەم."
