رووداو دیجیتاڵ
لەنێو جەرگەی ئەورووپا و لە شارە مێژووییەکەی قەیسەرەکاندا، دەرگاکانی رۆما بەڕووی سەرۆک مەسعود بارزانیدا کرانەوە؛ سەردانێک کە تێیدا دۆزی نەتەوەیەک و پرسی سەقامگیریی ناوچەیەکی ئاڵۆز لە جانتای دیپلۆماسیی سەرۆک بارزانیدایە.
لە چوارچێوەی سەردانە فەرمییەکەیدا بۆ ئیتاڵیا، سەرۆک بارزانی جارێکی دیکە جەختی لە پێگەی ستراتیژیی هەرێمی کوردستان کردەوە، وەک کارەکتەرێکی سەرەکی و کاریگەر لە هاوکێشە نێودەوڵەتییەکاندا.
دیدار لەگەڵ پاپای ڤاتیکان
یەکێک لە وێستگە گرنگەکانی سەردانەکە، دیداری سەرۆک بارزانی بوو لەگەڵ پاپا لیۆی 14هەم، پاپای ڤاتیکان. لە دیدارەکەدا جەخت لە نوێکردنەوەی ئەو پەیمانە کرایەوە کە کوردستان وەک مەڵبەندی پێکەوەژیانی ئایینەکان دەمێنێتەوە و پارێزگاری لەو فرەییە دەکات.
ئاسایش و ئابووری؛ تەوەری سەرەکیی گفتوگۆکان
تەوەری سەرەکیی گفتوگۆکانی سەرۆک بارزانی لەگەڵ بەرپرسانی باڵای ئیتاڵیا، پرسی ئاسایش و گەشەپێدان بوون. رۆما کە هاوبەشێکی کارای هاوپەیمانیی نێودەوڵەتی و پشتیوانێکی بەردەوامی هێزی پێشمەرگەیە، لەم دیدارە دیپلۆماسییانەدا جگە لە پەیوەندییە سیاسییەکان، پەرەپێدانی کەرتی ئابووری و کولتووریشی لەگەڵ هەرێمی کوردستان تاوتوێ کرد.
هەڵوێستی ئیتاڵیا لەسەر ناوچەکە
وەزیری دەرەوەی ئیتاڵیا سەبارەت بە بارودۆخی ناوچەکە رایگەیاند: "کاردەکەین بۆ بەهێزکردنی دیالۆگی نێوان حکومەتی شەرعی و خەڵکی سووریا، لەوانە کورد، درووز و کریستیانەکان. ئەمە بۆ ئێمە گرنگە، چونکە سەقامگیریی سووریا کلیلی سەقامگیریی رۆژهەڵاتی ناوەڕاستە."
وەزیری دەرەوەی ئیتاڵیا ئاماژەی بەوەش کرد کە وڵاتەکەی ئامادەی هەموو هەنگاوێکی پێویستە بۆ پاڵپشتیکردنی دیالۆگی نێوان لایەنەکان و گوتی: "بۆ ئێمە ناوچەی دەریای ناوەڕاست و رۆژهەڵاتی ناوەڕاست بایەخێکی زۆریان هەیە و بەشدارییەکی بەهێزمان لەوێدا هەیە؛ من باوەڕم بە ئاشتییە و دەمەوێت گەشبین بم."
پەیامێکی روون لە کاتێکی هەستیاردا
ئەم سەردانەی سەرۆک بارزانی بۆ ئیتاڵیا و ڤاتیکان، لە کات و ساتێکی هەستیاری ناوچەکەدا ئەنجام دەدرێت. پەیامی ئەمجارەی بارزانی لە رۆماوە روونە: کوردستان هەمیشە وەک هێمایەکی سەقامگیری و دیموکراسی لە رۆژهەڵاتی ناوەڕاستدا دەمێنێتەوە.
