رووداو- هەولێر
تەرمی ئەو گەنجە کوردەی کە لە کەناراوەکانی ئیتاڵیا تەرمەکەی دۆزرایەوە، دەهێندرێتەوە کوردستان.
تەرمی گەنجێکی کورد بەناوی "هەڵکەوت محەممەد" دانیشتووی سلێمانی، دوای 10 رۆژ لە ونبوونی رۆژی یەکشەممە 20-1-2019 لە کەناراوەکانی ئیتاڵیا دۆزرایەوە.
دادوەر سامان سەید عەتار، دادوەری نێودەوڵەتی بە (تۆڕی میدیایی رووداو)ی راگەیاند "بافڵ تاڵەبانی سوورە لەسەر هێنانەوەی تەرمی گەنجەکە و خەرجی هێنانەوەکەی لەئەستۆگرتووە".
دادوەر سامان سەید عەتار گوتیشی "وەکو دادوەرێکی نێودەوڵەتی و ئەندامی دادگای لاهای، لەسەر داوای کاک بافڵ و کەسوکاری گەنجەکە رێکارە یاساییەکانمان بۆ تەرمی گەنجەکە تەواوکردوون. کاری توێکاری تەواوبووە. لە چەند رۆژی داهاتوودا لەڕێگەی فڕۆکەخانەی نێودەوڵەتی هەولێر بێت یان سلێمانی تەرمی ئەو گەنجە دەهێنینەوە کوردستان".
رۆژی 10-1-2019 یەختێکی پەنابەران بە 51 سەرنشینەوە لە کەناراوەکانی ئیتاڵیا ژێرئاوکەوت، تەنیا تەرمی هەڵکەوت محەممەد نەدۆزرایەوە.
دادوەر سامان دەڵێت "دوای ئەوەی دادگای باڵای ئیتاڵیا و ئینتەرپووڵمان هێنایە سەر هێڵ و توانیمان لەڕێگەی سێ ژێردەریاوە بە قووڵایی 500 مەتر لەنێو ئاوەکە بەدوای تەرمی ئەو گەنجە کوردەدا بگەڕێن، بەڵام نەدۆزرایەوە، بەڵام 20ی ئەم مانگە تەرمەکەی لە کەناراوەکانی ئیتاڵیا سەرئاوکەوت".
